Yanvarniñ 26-da siyasiy mabüs jurnalist ve insan aqları faali İrina Danıloviçniñ mentorı olğan Petra Bayr Avropa Şurasınıñ Parlament Assambleyasınıñ yañı prezidenti oldı. Ukrayina deputatı Mariya Mezentseva-Fedorenko ise vitse-prezident olaraq saylandı.

“Çeşitlik tek tolerantlıq meselesi olmamaq kerek. Onı umumiy avropa menliginiñ bir qısmı olaraq ürmet etmek, qıymet kesmek ve faal qorçalamaq kerek. Men mında 9 ya 90 yaşında olsun, öz aqlarını qorçalağan er kesniñ adından turam. Er bir insan repressiyalardan qorqmayıp, öz baqışlarını ifade etme aqqına ve kerçek bir imkanğa saip olmalı”, — dedi yañı saylanğan prezident.

Petra Bayr Ukrayinağa halqara derecede devamlı yardım ete. O, tam miqyaslı ücüm başlanğanından berli Ukrayinağa bir qaç kere kelip ketken edi. Aynı vaqıtta Bayr Avropa Şurasınıñ Parlament Assambleyasınıñ qararları içün vesiqalar azırlavda iştirak etti, olarnıñ sayesinde Assambleya 2023 senesi rusiyeniñ Ukrainağa qarşı agressiyası 2022 senesi degil de, 2014 senesi başlanğanını qararlaştırdı.

Qırım siyasiy mabusleri içün başlatılğan ve rusiye federatsiyası tarafından qanunsız şekilde mahküm etilgen ukrayin vatandaşlarınıñ ikâyelerini cemaat ögünde aydınlatmaqnı közde tutqan mentorlıq programması 2021 senesinden başlap ömürge keçirilmekte. Mentorlar arasında çeşit memleketlerden programmağa qoşulğan tarihçılar, siyasetçiler, medeniyet erbapları, siyasetşınaslar ve fikir liderleri yer almaqta.