2018 senesi berim (sentâbr) ayı 12 künü Milliy azınlıqlar meseleleri boyunca AHİT Yuqarı Komissarı ofisiniñ eyeti Herson vilâyetine dört künlik ziyareti çerçivesinde Ukraina Prezidentiniñ Qırım MC Temsilciligini ziyaret etti.
Körüşüv esnasında Ukraina Prezidentiniñ Qırım MC Daimiy Temsilcisi Borıs Babin, Yuqarı Komissar ve AHİT eyetiniñ azaları Qırımnıñ vaqtınca işğali şaraitlerinde yarımadada yaşağan etnik ukrainalılarnıñ, bu topraqnıñ tamır halqı olğan qırımtatarlarnıñ ve milliy azınlıqlarınıñ aq-uquqlarını qorçalav ve temin etüv meselelerini, Ukrainanıñ nezareti altında bulunğan ve aynı vaqıtta Qırımğa yaqın olğan topraqlarğa işğalniñ tesirini muzakere ettiler.
İlk nevbette işğal etilgen topraqlarda Ukraina vatandaşlarınıñ tasil aqlarını kütleviy şekilde bozuv, bu cümleden, işğalcilerge boysunğan oquv yurtlarında ana tilinde tasil aluv ve böyle tilni ögrenüv sıñırlı ya da asla imkânsız olğanı, BMT Halqara mahkemesiniñ qararlarına baqmadan, Qırımda ukrain tilide tasil bergen umum tasil müessiselerniñ yoqlugı ve qırımtatar tilinde tasilni sıqıştıruv kibi meseleler muzakere etildi. İşğalcilerniñ böyle siyaseti, başqa maqsadlarnen beraber, vaqtınca işğal etilgen topraqlarda yaşap, Ukrainanıñ nezareti altında bulunğan topraqlarda aliy oquv yurtlarda tasilni devam etmege istegen vatandaşlar ögünde er taraflama manialarnı qoyğanı qayd etildi. Bu mesele boyunca Borıs Babin Yuqarı komissarnı, Herson vilâyetinde teşkil etilip, ‘‘Qırım-Ukraina’’ leyhası çerçivesinde qırımlılar içün qolaylaştırılğan usulnen Ukraina aliy oquv yurtlarında tolu şekilde tasillerini devam etmege imkân yaratqan uzaqtan ve eksternat şekilde oquv tertibatı ile tanıştırdı.
Körüşüvniñ iştirakçileri qırımtatar halqı vekilleriniñ aq-uquqlarını istilâcı devletniñ cezalayıcı küçleri tarafından sıñırlav ve doğrudan bozuv ameliyatını muzakere ettiler ve Qırımdaki milliy azınlıqlarnı kollektiv reineler olaraq Avropa Birliginiñ olarğa soy olğan devletlerge qarşı siyasiy şantaj içün qullanğanını hatırladılar.
Körüşüv devamında vaqtınca işğal etilgen topraqlarda yaşağan Ukraina vatandaşlar içün Ukrainanıñ nezareti altında bulunğan topraqlarda pasport vesiqalarını aluv imkânlarını keñişletüv muzakere etildi. Böyle merkezlerniñ memuriy sıñırğa yaqın olğan mesken yerlerde ve Herson şeerinde teşkil etilüvi maniasız, nevbetsiz ve qaparcılıq ile havfsızlıq ceetten telükelerge oğramadan bu hızmetlerni almağa imkân bergeni qayd etildi.
Memleket içinde köçken şahıslarnıñ aq-uquqlarını devlet organları tarafından qorçalav meselesi, vaqtınca işğal etilgen Qırımğa yaqın olğan rayonlarda AHİT Mahsus nezaret etici taqımnıñ faaliyetini quvetleştirüv muzakere etildi. Herson şeerinde 2018 senesi bozarğan (iyün) ayı 14 künü AHİT Demokratik institutlar ve insan aqları bürosı ile beraber keçirilgen ekspert muşaveresinde qabul etilgen tekliflerni yerine ketirüv oğrunda AHİT ile Temsilcilikniñ nevbetteki umumiy adımları muzakere etildi.
Körüşüvniñ soñunda Borıs Babin Lamberto Zanyerge Temsilcilikniñ faaliyetine ayırğan diqqatı içün minnetdarlığını bildirip, halqara teşkilâtlar ile işbirlik ve ortaqlıq işğal etilgen topraqlarda mevcut olğan vaziyetke obyektiv qıymet kesüv ve halqara cemiyet tarafından mütenasip qararlarnıñ alınuvı içün pek muim olğanını qayd etti.