Oktâbrniñ 23-te Rigada “Sürgünlikniñ sımaları” ve “Ağır sınavlarğa baqmadan” adlı sanat leyhaları taqdim etildi, olar Üçünci Parlament Summian Platformasınıñ medeniy programması çerçivesinde “QIRIM İÇÜN” sergisiniñ bir qısmı oldılar. 

Qırımtatar ressamı Zarema Yalıboylu tarafından yaratılğan “Sürgünlikniñ sımaları” adlı fotoleyha 1944 senesi sürgünlikte sağ qalıp, tuvğan toprağına qaytıp olğan qırımtatarlar aqqında ikâye etmekte. Fotoressam fotoresimler vastasınen rusiyeye tarafından tarihiy faktları yañıdan yazılğan, mimariy abideleri yoq etilip, til-medeniy ananeleri bastırılıp, asırlar devamında zengin medeniyeti ve tarihı yoq etilmege tırışılğan halqınıñ taqdirini köstermege tırışa.

“Ağır sınavlarğa baqmadan” installâtsiyası qırımtatarlarnıñ yıllar devamında sürgünlikte yaşağan soñ, Vatanına avdet devtini tasvir ete. Sergi ev eşyaları, aqiqiy urbalar, ananeviy esnaflar vastasınen medeniy miras ve qırımtatarlarnıñ kündelik ayatı arasındaki bağnı köstere. İnstallâtsiya tek maddiy mirasnı yetkizmekni degil de, sürgünlikten evelki yaşayışnıñ maddiy olmağan hatırlavlarını – sovet akimiyeti qırımtatarlardan tartıp alğan barışıq, adiy ömür hatırlavlarını saqlap qalmaqnı közde tuta, çünki bugünki künde de Rusiye bunı tekrar yapmağa devam ete.

İnstallâtsiyada “Qırım evi“ devlet müessisesiniñ, “Musafir“ qırımtatar restoranınıñ, qırımtatar çölmekçi ve “Yol“ leyhasınıñ kuratorı Rustem Skibinniñ, “Aqyar“ qırımtatar keramika ustahanesiniñ, “Ptashatam“ keten toqumacılıq markasınıñ ve “Triytsya collections“ ananeviy ağaç ustahanesiniñ eserleri ve materialları taqdim etildi.

Sergi Temsilcilik/Qırım platformasınıñ ofisi ile Ukrayina Yuqarı Radası, Ukrayinanıñ Latviyadaki elçiligi, Büyük Britaniyanıñ Ukrayinadaki elçiligi, “Crimea Daily” media teşebbüsi, “Qırım evi” devlet müessisesi, Ukrayina İnstitutı, TRO Media, ZMİNA İnsan aqları merkezi, “Musafir” restoranı ve “Küçlü Ukrayina içün ortaqlıq” Fondu ile işbirlikte teşkil etildi.