Temsilcilikte ekspertlerniñ Ukrainada UNESCO Temsilciligi ile körüşüvi olıp keçti. Körüşüv işğal etilgen Qırımda medeniyet, sport, medeniy miras, etraftaki müit, söz serbestligi ve jurnalistlerniñ telükesizligi saasında vaziyetke bağışlandı.

Körüşüvge Daimiy Temsilciniñ muavini Denis Çistikov, Ukrainada UNESCO Temsilciliginiñ yolbaşçısı K’yara Detszi Bardeскі, Qırım platformasınıñ faaliyetini temin etüv hızmeti yolbaşçısınıñ muavini Anna Sıtnikova, “ZMINA” İnsan aqları Merkeziniñ leyhalar meneceri Viktoriya Nesterenko, Qırım aq qorçalayıcı gruppasınıñ halqara advokatsiyasınıñ meneceri İrina Baran El Gali, “Almenda” tasil Merkeziniñ başı Mariya Sülâlina, İnsan aqları regional merkeziniñ adliyecisi Katerina Raşevska, Qırım Muhtar Cumhuriyetiniñ sport küreşi Federatsiyasınıñ vitse-prezidenti, QIRIM.MEDIA müdiri İmran Useinov, BM Tamır halqlar meselelerinden Daimiy Forumnıñ eksperti Suleyman Mamutov, Ukraina Milliy İlimler Akademiyasınıñ Arheologiya İnstitutınıñ uyken ilmiy hadimi Evelina Kravçenko, ICOMOS azası Aliye İbragimova, tetqiqatçı, deñiz emicileri mütehassısı Pavlo Goldin iştirak ettiler.

Ekspertler jurnalistler aqlarınıñ, söz serbestliginiñ, milliy azlıqlarnıñ tasil aqlarınıñ sistematik bozuluvı; işğal etilgen Qırımda tasilniñ askeriyleştirilüvi; medeniy miras obyektleriniñ, hususan Hersones ve Han saraylarınıñ yoq etilüvi neticesinde ukrain ve qırımtatar kimliginiñ yoq etilüvi; işğal etilgen Qırımda rusiye areketleri sebebinden ekologik telükeler meydanğa kelgeni aqqında aytıp berdiler.

Körüşüvniñ soñunda iştirakçiler fikirlerinen paylaşıp, halqara teşkilâtlarnıñ, hususan UNESCO-nıñ, insan aqları bozuluvı adiselerini nezaret etüv ve oña cevap berüvde iştirak etmesiniñ müimligini qayd ettiler.