Mayısnıñ 27-nde Temsilcilikte Ukrayina Prezidentiniñ Qırım Muhtar Cumhuriyetindeki Temsilciligi/Qırım platformasınıñ Ofisi, ekspert müiti ve Ukrayinada UNESCO Antennasınıñ meslatlaşuv körüşüvi olıp keçti. Körüşüv Qırımda söz serbestligi, tasil, medeniyet, sport ve tabiat mirasınıñ qoruvı saalarında 2025 senesi iyün – 2026 senesi iyün arasında yüz bergen vaziyetke bağışlanğan.
Tedbirge Ukrayina Prezidentiniñ Qırım Muhtar Cumhuriyetindeki Temsilcisi Olga Kurışko, UNESCO Antennasınıñ reisi Chiara Dezzi Bardeschi ve Qırım mevzusında çalışqan uquq qoruyıcılar ve ekspertler qoşuldı.
Tedbirni Qırım platformasınıñ faaliyetini temin etüv hızmetiniñ reberi Nelâ Grınışın alıp bardı.
Körüşüv vaqtında Daimiy Temsilci, vaqtınca işğal etilgen Qırımdaki vaziyet kerginleşmege devam etkenini qayd etti. Onıñ sözlerine köre, Rusiye medeniyet ve tarihnı manipulâtsiya ve cenk aletleri olaraq qullana, ukrayin ve qırımtatar kimliginiñ yoq etilmesi ise istilâcı devletniñ devlet siyasetiniñ bir qısmı oldı.
“Rusiye içün er şeyni mental ve fizikiy ceetten yoq etmek, hatıralarnı silmek, tarihnı deñiştirmek ve özgünlikni yoq etmek alışılğan bir şey oldı”, – dep qayd etti Olga Kurışko.
Öz nevbetinde Chiara Dezzi Bardeschi işbirligi içün teşekkür bildirip, Qırımdaki vaziyetni daima nezaret etüvniñ müimligini qayd etti. Onıñ aytqanına köre, UNESCO medeniyet, tasil ve söz serbestligi saalarında bozuvlarnı qayd etmege devam ete, em de rus işğali sebebinden peyda olğan meselelerge cevap bermek içün ameliy işbirlik ve koordinatsiyanı quvetleştirmek kerekligini qayd etti.
“Biz bu işbirlikni qıymetlendiremiz ve bugün bozuluvlarnı tek qayd etmek degil de, olarğa cevap bermek içün ameliy işbirlikni quvetleştirmek ne qadar müim olğanını añlaymız” , – dep qayd etti UNESCO Antennasınıñ reisi.
Bundan da ğayrı, iştirakçiler söz serbestliginiñ sistematik bozuluvı ve jurnalistlerniñ taqip etilüvi, hususan Qırım jurnalistleriniñ qanunsız apiske alınması, olarnıñ Rusiye SİZO ve koloniyalarına avuştırılması, haber alanında nezaretniñ quvetleştirilüvi aqqında söz yürsettiler. Mustaqil jurnalistler, blogerler ve cemaat faalleri içün telükeler, Qırımda mustaqil jurnalistikanıñ yoq etilmesi ve rusiyeniñ yañı informatsion nezaret aletleri, şu cümleden MAX messenceriniñ qullanılmasına diqqat ayrıldı.
Körüşüv vaqtında tasil esnasınıñ askeriyleştirilüvi, tarihnıñ rusiye teşviqatına köre yañıdan yazılması ve Qırımda tasil aqqına sistematik basqı aqqında söz yürsetildi. Spikerler medeniy mirasnıñ yoq etilüvi, tamır halqlarnıñ ve milliy azlıqlarnıñ medeniy aqlarınıñ bozuluvı, sport saasındaki vaziyet, em de işğal etilgen yarımadanıñ tabiat mirasınıñ saqlanuvı ile ekologik telükeler meselesine diqqat ayırdılar.
Körüşüvniñ soñunda iştirakçiler vaqtınca işğal etilgen Qırımda insan aqları bozulğanını qayd etmek ve medeniy ile tabiiy mirasnı qorçalamaq içün halqara teşkilâtlarnen, hususan UNESCO ile ilerideki işbirlikniñ müimligini qayd ettiler.и наголосили на важливості подальшої співпраці з міжнародними організаціями, зокрема ЮНЕСКО, для фіксації порушень прав людини та захисту культурної й природної спадщини на тимчасово окупованій території Криму.