“Ukraina milliy efsanesi” merasiminde Milliy Meclis reisiniñ birinci muavini Nariman Celâl çıqış yapıp, Qırım Ukrainanıñ ayırılmaz parçası olğanını daa bir kere qayd etti. Çıqışta Celâl böyle dedi:

“Daa eki ay evelsi, men rus apishanesinde edim, anda alâ daa eki yüzden ziyade qırımtatar siyasiy mabüsi qalmaqta. Men halqıma, vatanıma sadıqlığım ve tuvğan yarımadamnı zapt etken işğalcige boysunmağa istemegenim içün türmege atıldı”.

“Ukraina vatandaşı, Ukraina tamır halqınıñ vekillik organı olğan Milliy Meclis reisiniñ birinci muavini olaraq, işğal etilgen Qırımda semetdeşlerimniñ, Ukraina vatandaşlarınıñ menfaatlarını qorçalamağa aqqım ve vazifem olğanınen er vaqıt ğururlandım. Men qırımtatarım ve bugün menim eñ müim vazifem – iç bir vaqıt Qırımnı unuttırmamaqtır”.

“Çoqusı ukrainler içün Qırım nedir? Adet üzre, bu Yalta ya da Sudaqnıñ bir yerinde dülber yalıları olğan sıcaq deñizdir; bu balalıqtan qalğan hatırlavlar, qırımlılarnıñ sade ve samimiy musafirçenligidir; kökke qadar uzanğan dağlar; bu qadimiy Bağçasaray ve kiçik Kezlevdir. Menim içün Qırım evdir. Zalım, yalancı ve yaman niyetli duşmannen vaqtınca işğal etilgen ev. Olar bizim topraqlarımıznı zapt etti, lâkin ruhumıznı iç bir vaqıt zapt etip olamaz, çünki aqiqiy qırımlınıñ ruhu çöldeki yel kibi serbest, Qırım dağları kibi quvetli, Qara deñizniñ furtunalı dalğaları kibi yeñilmezdir”.

“İşğalciler, olarnıñ fikrince, Qırım yarımadasını ve Rusiyeni bağlamaq içün köpür qurdılar. Şimdi menim ögümde Oleksandr Usik otura, o, Qırımımıznen Ukraina arasında yıqılmaycaq aqiqiy köpür. O qurulışnı ise bugünki efsanelerimizniñ daa birisi, İvan efendige (İvan “Hanter” Lukaşeviç – SBU generalı. Sea Baby deñiz dronları yaratıluvınıñ mefkürecisi) qaldırayıq.

Çıqışnıñ tolu videosını aşağıda seyir etiñiz.