Ukraina Prezidenti Petro Poroşenko, Ukrainada iş ziyareti ile bulunğan Norvegiya çetel işler Naziri İne Eriksen Syoreyde ile körüşti. Petro Poroşenko ve Ine Syoreyde Herson vilâyetinde NBT norvegiya şirketiniñ faal qol tutuvı ile başlatılğan yel elektrik stantsıyalarnıñ quruluvı boyunca büyük halqara yatırım leyhasını alğışladılar. ‘‘Yatırımıñızda teren mana köremiz ve Qırım ile sıñırda norvegiya şirketiniñ yatırımlarını Qırımnı işğalden azat etilüvine Norvegiyanıñ bir issesi olaraq tanıymız’’, – dep qayd etti Ukraina Prezidenti ve Ukrainanıñ cenübinde yel elektrik stantsıyalarnıñ quruluvı boyunca büyük halqara yatırım leyhasını alğışladı.

Subetdeşler evelki zamanlarğa köre bayağı quvetleşken Ukraina ile Norvegiya arasındaki işbirlikke yüksek qıymet kesip, eki taraflama munasebetlerni daa ziyade quvetleştirmege azırlıq kösterdiler. Prezident Norvegiya Ükümetine Ukrainanıñ mustaqilligine ve topraq bütünligine qol tutuv içün öz minnetdarlığını bildirdi. Taraflar Rusiyedeki siyasiy mabuslarnı, bu cümleden, Oleg Sentsovnı, Roman Suşçenkonı, Volodımır Baluhı ve qırımtatar faallerni azat etüv boyunca nevbetteki adımlarını muzakere ettiler. ‘‘Ukraina mustaqilligine qattı sürette qol tutqan sanktsıyalarıñız içün öz minnetdarlığımnı bildirem. Ve rusiye apishanelerinde bulunğan ukrain siyasiy mabuslarnı azat etüv oğrunda halqara areketke qoşulmağa Sizge de rica etem’’, – dep qayd etti Petro Poroşenko.