2025 senesi iyünniñ 18-nde Felemenk Qırallığınıñ Baş Devletler Vekiller Palatası 1944 senesi qırımtatar halqınıñ kütleviy sürgünligini sovet rejimi tarafından yapılğan genotsid olaraq tanığan qararnı qabul etti (vesiqanıñ qaydiyet nomerası — 21 501-20, № 2259).

Qabul etilgen qarar metninde, 1944 senesi qırımtatarlarnıñ kütleviy sürgünligi zemaneviy halqara-uquqiy standartlarğa köre genotsid olaraq tanılmaq kerekligi qayd etile. Rezolütsiyada 2014 senesi Qırımnıñ qanunsız işğalinden soñ rusiye federatsiyası tarafından repressiv siyaset sebebinden bir çoq qırımtatarınıñ apiske atılğanı, işkencege oğratılğanı ya da ğayıp olğanı bildirile. Palata, rusiyeniñ, SSCBniñ devamcısı olaraq, qırımtatar halqına qarşı genotsid siyasetini devam ettirgenine inana.

Felemenk parlamentiniñ ast palatası ükümetke muracaat etip, Avropa Birliginiñ aza-devletleri ile 1944 senesi qırımtatar halqınıñ genotsidini tanıma imkânlarını ögrenmege ve ortaqlarnen koordinatsiya yapıp, böyle neticege irişmek içün potentsial yollarnı belgilemege çağırdı.

Daa evel 2015 senesi Ukraina, 2019 senesi Latviya ve Litva, 2022 senesi Kanada cemaat palatası, 2024 senesi Poloniya, Estoniya ve Çehiya Senatı qırımtatar halqınıñ sürgünligini genotsidi olaraq tanığan edi.

Temsilcilik, Felemenk Temsilciler Palatasına Ukrainanıñ suvereniteti ve topraq bütünligine qoltutqanı, em de işğal şaraitlerinde öz aqları ve serbestligi içün küreşini devam etken qırımtatar halqınen birdemligi içün teren minnetdarlığını bildire. Ukraina parlamenti, Tışqı işler nazirligi ve Qırımtatar Milliy Meclisi ile birlikte 1944 senesi sürgünliginiñ genotsid olaraq tanılması boyunca faaliyetni devam etmekte.

Başqa memleketlerniñ parlamentlerini 1944 senesi sürgünliginiñ genotsid olaraq tanılması esnasına qoşulıp, Ukraina ve qırımtatar halqına qol tutmağa çağıramız. Tarihiy adaletniñ ğayrıdan tiklenilmesini tek ortaq ğayretlernen temin etmek mümkün.