Taqiplerden evel yaşayışı

Volodımır Maladıka 1963 senesi iyülniñ 8-nde Donetsk vilâyetiniñ Yenakiyevo şeerinde doğdı. Mektepni bitirgen soñ aşçı zenaatını aldı, soñra ise ”Uçquçlar ve köçüricilerniñ tehnikiy işletüvi” ihtisaslaşuv boyunca rusiyede deñiz aviatsiyası tehnikleri mektebinde oqudı. Oquvdan soñ Aqyar civarındaki Kaça köyünde tehnik olaraq hızmet etti.

Volodımır avtomobillerni pek seve edi, hususan kuzovlarnıñ qaynaq işlerini begene edi. Bir kere o, öz başına eski GAZ-21 maşnasından yañı avtomobil toplap, onı resmiy olaraq qayd etti. Tuvğanları ve tanışları onı istidatlı bir mehanik, er vaqıt başqalarğa yardım etmege azır olğan duyğulı ve musafirperver adam olaraq tanıy ediler.

Bundan da ğayrı, Volodımır dinnen meraqlanıp, “Yegova şaatları” teşkilâtınıñ azası edi.

Taqipler

2020 senesi oktâbrniñ 1-nde rus işğalci uquq qoruyıcılar Aqyar civarındaki dindarlarınıñ evlerinde tintüvler keçirdi. Aynı şu künü işğalciler Volodımır Maladıkağa qarşı cinaiy iş açtı, onı “ekstremist teşkilâtınıñ faaliyetini teşkil etüvde”, hususan, rusiyede 2017 senesinden berli yasaqlanğan “Yegova şaatları” teşkilâtında iştirak etüvde qabaatladılar.

Maladıkanı qabaatlamaq içün esas olaraq, FSB hadimleri tarafından gizliden qayd etilgen dört ibadetniñ videoyazmaları qullanıldı. Volodımır Maladıkanıñ evinde keçirilgen tintüv vaqtında FSB hadimleri quru süt paketini tapıp, anda sözde narkotik maddeleri saqlağanınğandan şübelendiler. Soñra ekspertiza, bu sade quru süt olğanını tasdıqladı.

2022 senesi oktâbr ayında Aqyarnıñ işğalci mahkemesi Volodımır Maladıkanı umumiy rejimli koloniyada 6 yılğa qadar apis cezasına mahküm etti. Bundan da ğayrı, işğalciler oña 7 yıl devamında maarif faaliyetinen oğraşmağa, kütleviy haber vastalarında çıqışta bulunmağa ve internette malümat derc etmege yasaq ettiler. Azat etilgen soñ da oña bir yılğa qadar sıñırlavlar belgilendi.

Apis müddeti

2023 senesi dekabr ayında Volodımır Maladıkanı Qırımdan rusiyege avuştırılğanı belli oldı. Onı rusiye federatsiyasınıñ tambov vilâyetindeki 3-nci apishanege yolladılar.

Zulümler, uzun müddet SİZOda bulunması ve adaletsiz cezağa baqmadan, Volodımır Maladıka işğal etilgen Qırımda diniy taqiplerge qarşılıq kösterüvniñ timsali olıp qala.

Onıñ ikâyesi, rusiye işğalci akimiyetiniñ sözde “ekstremizm” maddesi, insanlarnıñ inançları ve fikirleri sebebinden olarğa basqı köstermek içün nasıl etip bir alet olaraq qullanğanını köstermekte.