Taqiplerden evel yaşayışı

Enver Ametov 1975 senesi avgustnıñ 2-nde Özbekistannıñ Şarqındaki Ferğana şeerinde doğdı. Yerli mektepniñ tek 8 sınıfını bitire: beş balasınen baqıcısız qalğan anasına yardım etmek içün işke başlamağa mecbur ola.

Onıñ qorantası 1992 senesi sürgünlikten Qırımğa qayta. Kelecek sene Enverni Aqyarda deñiz flotuna çağıralar. Hızmetini bitirgen soñ, o, qurucı olıp çalışmağa başlay.

1997 senesi aydavcılıq kurslarını bitire, 1998 senesinden başlap Aqmescitte bazarda çalışa, qorantasına – anasına, küçük qardaşlarına ve tatasına yardım ete.

2004 senesi evlene. Ametovlarnıñ üç balası bar.

Apiske alınmazdan evel o, qorantasınen beraber Aqmescit şeerinde yaşay edi. Qurucı olıp çalıştı. Boş vaqıtlarında balalarınen vaqıt keçirmege seve edi.

Enver taqipke oğrağan qırımtatarlarğa qoltutqan “Qırım birdemligi“ teşkilâtında faal edi. O, Qırımda siyasiy davalar boyunca ötkerilgen “mahkeme oturuşuvlarına“ daima qoşula edi.

Taqipler

2019 senesi martnıñ 27-nde Aqmescit rayonınıñ Kamenka, Stroganivka ve Bile qasabalarında işğalciler tarafından qırımtatarnıñ evlerinde qanunsız kütleviy tintüv olıp keçti. O künü işğal idaresiniñ havfsızlıq küçleri 20 qırımtatarnı, şu cümleden Enver Ametovnı tutıp aldı.

2019 senesi martnıñ 28-nde işğalciler rusiyeniñ rostov vilâyetiniñ aksay şeerinde daa üç qırımtatarnıñ tutulğanı aqqında haber ettiler. Tutulğanlar arasında Qırım Birdemligi teşkilâtınıñ vatandaş jurnalisi Osman Arifmemetov da bar edi.

Aynı kün Aqmescitteki işğalci “mahkeme“ tutulğanlarnıñ episine profilaktik tedbir şeklinde apis cezası qararı çıqardı.

2019 seneniñ yazında “Qırım musulmanları davasınıñ Aqmescit gruppası“ çerçivesinde tutulğanlarnıñ sayısı 25 adamğa qadar arttı. Tutulğanlarnıñ çoqusı Qırımda siyasiy taqibi qurbanlarını qorçalavda faal işlerinen belli olğan “Qırım birdemligi“ cemaat areketiniñ faalleri edi. Olarnıñ arasında insan aqları qorçalayıcıları, vatandaş jurnalistler ve göñülliler bar.

Materiallarnıñ çoqluğı sebebinden işğalciler 25 iştirakçiden ibaret cinaiy davanı beş mahkemelengenden ibaret olğan beş gruppağa böldiler.

2020 senesi Ametovanı “konstitutsiya tertibini yıqmağa azırlanğanı“nda da qabaatladılar.

Apis devri

2022 senesi noyabrniñ 24-nde rusiyeniñ rostov-na-donu şeerindeki mahkeme qırımtatralarnı “terrorcılıq faaliyeti“ ve “akimiyetni elge keçirmege ıntıluv“ aqqında uydurılğan qabaatlavlar boyunca qabaatlı dep taptı. Enver Ametov ve Yaşar Muyyedinov maksimal havfsızlıq koloniyasında 13 yılğa, vatandaş jurnalistleri Ruslan Suleymanov, Rustem Şeyhaliyev, Osman Arifmemetov ise 14 yılğa mahküm etildiler.

Enver Ametov apiske alınğan soñ, bir süre rusiyeniñ rostov vilâyetiniñ novoçerkassk şeerindeki SİZO-da tutuldı. Bundan soñ onı qanunsız sürette rusiyeniñ lipetsk vilâyetiniñ yelets şeerindeki apishanege avuştırdılar.

Enverniñ apayı aytqanına köre, apiske kirgenden berli onıñ sağlıq vaziyeti bayağı yaramadı. Rusiyeniñ lipetsk vilâyetiniñ yelets şeerindeki apishanede adam 15 kilogrammga arıqladı, onıñ B gepatiti ise keskinleşti.

Onıñ aytqanına köre, mahkeme qararı çıqqan soñ, daa novoçerkassk SİZO-sında olğanda, qırımtatarnıñ aşqazanı ağıra edi. Mabüske ine yapqanlar, çünki ilaçlar yardım etmedi. Aynı vaqıtta onıñ tiş meseleleri de ağırlaştı, közleri de bozuldı. Ondan ğayrı, Ametov apayına tutulğan kameradaki dımlıq aqqında da söyledi.