Apisten evel yaşayışı

Enver Kroş 1991 senesi noyabrniñ 14-nde Canköyde doğdı. O yıllarda onıñ qorantası Merkeziy Asiyada sürgünlik yerlerinden endi Qırımğa qaytıp kelgen edi. Orta tasilini Canköy rayonınıñ Novostepove köyünde aldı.

Ağasınen beraber cep telefonlarını tamir etüvden öz işlerini açtılar. Soñra, öz başına daa bir qaç zenaatnı öğrenip, iklimlendirgiç quruvı ve suvutqıç donatmalarnı tamir etüvnen oğraştı.

2012 senesi Enver evlendi. Çiftniñ üç balası bar – Kamila, Muslim ve Aziz.

Taqipler

2014 senesi Qırım rusiye tarafından işğal etilgen soñ Enver Kroş faal şekilde halqınıñ cemaat yaşayışına qoşuldı. O, qırımtatarlarnıñ evlerinde keçken tintüvlerge qatnadı , dualarda iştirak ete, vaqialarnı canlı yayında paylaştı, grajdan jurnalisti olaraq faaliyet kösterdi.

2015 senesi, işğalci quvetçiler onı qaçırıp, işğalci memuriyet tarafından zapt etilgen binada elektrik aqımı ile onı işkencelerge oğrattılar. Siyasiy mabüsden mahsus hızmetlernen işbirlik tutmasını, diger qırımtatarlarğa qarşı yalan şaatlıq etmesini talap ettiler, onı yalan aytmağa zorlamağa tırıştılar, bu ise cinaiy işlerniñ sayısını ve vatandaşlarınıñ taqip etilmesini arttıracaq edi. Lâkin o , işğalci quvetlernen işbirlik yapmaqnı kesen-kes red etti

2018 senesi işğalci memuriyet kene faalniñ taqip etilmesini başladı, o vaqıt onı, ekstremist teşkilâtlarnıñ timsallerini teşviq etkeninde qabaatlap, 10 künge apiske aldılar.

2022 senesi avgustnıñ 11-nde Canköy rayonında qanunsız kütleviy tintüvler keçirildi. O künü olar Enverniñ evine de kirdiler. O künü Enverden ğayrı daa altı kişi – Vilen Temeryanov, Seyityaya Abbozov, Murat Mustafayev, Edem Bekirov ve Rinat Aliyevni “Qırım musulmanlarınıñ birinci Canköy gruppası davası” çerçivesinde tutulğan edi.

Tutuluv vaqtında da Enverni işkencelerge oğrattılar. Altı silâlı quvetçi onı mikroavtobusqa oturtıp, yol boyu kötekledi, başına qayış bağlap, boğdılar, ellerini arqa tarafından qırıp, telefonınıñ blokunı açmağa zorladılar.

Apis müddeti

2022 senesiniñ avgust ayında Qırım Yuqarı mahkemesi onı apiste qaldırdı, imayeniñ apellâtsiyası red etildi. Oturışuv qapalı şekilde keçti, advokatlar ve yaqınlarını kirsetmediler. O yılnıñ oktâbr ayında Enver Kroş mecburen Aqmescit civarındaki psihiatrik teşkerüvge yollandı.

2022 senesinden başlap, işğalciler SİZOda siyasiy mabüsniñ apis müddetini eñ azından 5 kere qanunsız sürette uzattılar.

2025 senesi iyünniñ 5-nde rusiye mahkemesinde qabaatlav tarafı Enver Kroş içün 17 yıl sert rejimli koloniyada qalmasını, olardan dört yılını apiste keçirmesini istedi. Diger mabüsler – Edem Bekirov ve Rinat Aliyev – 15 yıl, jurnalist Vilen Temeryanov – 13 yıl, Seytâğa Abbozov – 11 yıl (sağlıq vaziyeti sebebinden ev apsinde buluna) cezağa mahküm etildi.

Siyasiy mabüslerniñ evlerinde tapılğan kitaplarda siyasiy mabüslerniñ parmaq izleri olmağanını tasdıqlağan mustaqil daktiloskopik ekspertizağa baqmadan, olar qanunsız şekilde rusiyeniñ rostov-na-donu SİZOsında tutulmağa devam etmekte.