Apisten evel yaşayışı
İsmailov Rustem Yakuboviç 1984 senesi sentâbrniñ 3-nde Özbekistannıñ Navoi şeerinde doğdı, 1992 senesi ise qorantasınen Qırımğa qaytıp keldi. Mektepni bitirgen soñ, Rustem Qırım biznes institutına oqumağa kire. Anda “Halqara iqtisadiyat” mütehassıslığı boyunca aliy tasil aldı.
Bundan soñ Rustem alış-veriş merkezinde satıcı, soñra – hususiy işhanede qurucı ve mebel cıyıcısı olıp çalıştı. O, tercimanlıqnen de oğraştı.
2008 senesi aprel ayında Rustem evlendi. Onıñ üç balası – bir qızı ve eki oğlı bar. Apiske alınmadan evel, qoranta Aqmescit rayonınıñ Kamenka qasabasında yaşay edi.
Soy-sopları ve dostları Rustemni namuslı ve adaletli adam, balalarını ve apayını qayğırğan biri olaraq tasvir eteler. Onıñ içün qoranta ve balalarını terbiyelev birinci yerde edi. Bunen beraber o, muhtac olğanlarğa yardım etmege vaqıt ve küç tapa edi. O, dindar musulman olaraq, diniy ananelerge riayet etip, öz inançlarına köre yaşay edi.
Taqipler
2016 senesi oktâbrniñ 12-nde Rusiye havfsızlıq küçleri Aqmescit vilâyetiniñ Kamenka ve Strogonovka qasabalarında qırımtatarlarnıñ evlerinde kütleviy tintüvler keçirdiler. Saba saat altılarğa yaqın, Rustem ve onıñ apayı Fatma endi uyanıp, saba namazına azırlanğanda, rus havfsızlıq küçleri evniñ ög qapusını qırıp, olarnıñ evine sürip kirdiler.
Havfsızlıq küçleri tintüv vaqtında özüni terbiyesiz alıp bardılar, qorantağa mahsus basqı yaptılar. Qadınnıñ aytqanına köre, tintüv vaqtında bütün evni ast-üst ettiler. Başqa şeylernen beraber, Rustemniñ ağasına ait olğan ve saqlanuv içün qaldırılğan 13 biñ dollarnı elge keçirdiler.
Tintüvlerden soñ Rustem İsmailov “Qırım musulmanları davası“ çerçivesinde qabaatlandı, hususan Rusiyede terrorcı teşkilât dep sayğan “Hizb-ut-Tahrir“ teşkilâtında iştirak etüv iddiaları içün.
Apis müddeti
Rustem İsmailov 2016 senesi dekabr ayında apiske atılğan soñ, Aqmescitteki fsb binasında köteklegeni ve qorquzdırılğanı, psihologik ceetten basqı körgeni aqqında haber etti.
2017 senesi fevral ayında o ve Ayder Saledinov psihiatrik ekspertiza içün zornen psihiatriya hastahanesine avuştırıldı. Böyle şeyler insan aqları faalleri tarafından siyasiy mabüslerge qoşma basqı yapmaq içün bir alet olaraq körüle.
2017 senesi dekabrniñ 29-nda Aqmescitniñ SİZO Rustem tutulğan kamerada tavannıñ aman-aman bir kvadrat metrlik parçası yıqılıp, onı yaraladı. Bu vaqia binanıñ uyğun olmağan vaziyetini ve mabüsler içün havflı olğanını tasdıqladı.
2019 senesi iyünniñ 18-nde rostov-na-donu şeerindeki şimaliy kavkaz rayonınıñ arbiy “mahkemesi” Rustem İsmailovnı qattı rejimli koloniyada 14 yılğa mahküm etti. Soñra bu müddet altı ayğa eksilip, 13 yıl ve 6 ay apis müddetine çevrildi.
2020 senesiniñ başında Rustemni ufağa avuştırdılar, soñra ise SİZO yanındaki tibbiyet müessisesine yerleştirdiler. Bir qaç afta devamında qorantası onıñ qayda olğanı aqqında resmiy malümat alamay edi. Tek aprel ayında o, başqırtistan cumhuriyetiniñ salavat şeerindeki 2-nci sanlı tüzetiş koloniyasında tutulğanı belli oldı.
Rustem ceza müddetini vaqtında, defalarca ceza izolatorına tüşti. Diniy merasimlerge riayet etüv, hususan, gece namazlarını qıluv – ceza içün resmiy sebeplerden biri edi. Cexza izolatorında tutuluv şartları daa da qattı ve daa da sıñırlıdır. Sistemalı basqı, avuştırıluvlar ve tecrit etilmesine baqmadan, Rustem İsmailov ayaqta qalmağaa ve menligini saqlamağa devam ete.