Apisten evel yaşayışı

Enver Seytosmanov 1986 senesi noyabrniñ 10-nda Özbekistanda doğdı. Qırımğa qaytqan soñ qorantası Sadove köyünde yerleşti. Mında mektepni bitirip, Belogorsk köy hocalığı ve aşayt mahsulatları zenaat-tehnik oquv yurtuna oqumağa kirdi, anda traktorcı-maşinist zenaatını qazandı.

Enver ayatı devamında farqlı saalarda çalıştı: aydavcı, mehanik, qurucı, em de ev hocalığı ile oğraştı – sebze östürdi ve tuvarcılıqnen oğraştı. O, diniy tedbirlerniñ teşkil etilmesinde de iştirak ete edi, hususan, caminiñ tamir işlerine qoşula, qırımtatar siyasiy mabüsleriniñ qorantalarına qol tuta edi.

Taqipler

2015 senesi Aqyarda tutuluvlar dalğasından soñ Enver Seytosmanov qardaşınen beraber apiske alınğanlarnıñ qorantalarına faal yardım etmege başladı. Bu, Rusiye quvetçileriniñ diqqatını celp etti – qardaşlarnı sorğularğa çekmege, basqı yapmağa ve dava iştirakçilerine qarşı şaatlıq etüvlerini talap etmege başladılar. İşbirlik yapmasalar, cinaiy taqip ile qorquza ediler.

2018 senesi Rusiye quvetçileri qardaşlarnıñ ve anasınıñ evinde tintüvler keçirdi. Bundan soñ olarnı tutıp aldılar ve “Qırım musulmanları davası” çerçivesinde, şu cümleden Rusiye tarafından terror teşkilâtı olaraq tanılğan “Hizb ut-Tahrir” teşkilâtında iştirak etüvde qabaatladılar.

Apiske alınğan soñ

2019 senesi dekabrniñ 5-nde Rusiye “mahkemesi” onı 17 yıl sert rejimli koloniyada qalmasına üküm etti. Enver soñki sözünde taqipniñ siyasiy sebeplerden dolayı başlatılğanını qayd etti. Onıñ aytqanına köre, qırımtatarlar ve musulmanlar terrorist degil, özü ise – “cinayet yapmağan cinayetçi olaraq kösterilgenini” bildirdi. O, Qırımdan qanunsız çıqarılğan ve Rusiyede mahküm etilgen Ukrayina vatandaşı olğanını ifade etti.

2020 senesi Enver rusiyedeki salavatnıñ koloniyasına avuştırıldı. Anda alâ daa tutulmaqta. Esirlikte mabüs, ruslarnıñ basqılarına maruz qalmağa devam ete.