Apisten evelki yaşayışı:

Seyran Hayretdinov Özbekistannıñ Namangan vilâyetindeki Kasansa şeerinde doğdı. Biñlerce qırımtatar qorantaları kibi, onıñ qorantasına da tek 1980-inci senelerniñ soñunda Qırımğa qaytıp oldı.

Seyran Bağçasaray zenaat qurucılıq litseyinde tasil aldı, avtomehanik ve aydavcı zenaatını öğrendi. O, zenaatı boyunca çalışmadı – oquvını bitirgen soñ, babasınen beraber qurucılıqta çalıştı.

O, evli, üç balalı, evelde cemaat yaşayışında faal iştirak ete ve balalar içün tedbirler teşkil ete edi.

Taqipler

2020 senesi iyülniñ 7-nde Qırımnıñ çeşit rayonlarında kütleviy tintüvler vaqtında işğalciler Seyran Hayretdinovnı diger qırımtatarlarnen beraber tutıp aldılar. O künü tintüvler sözde “terrorcılıq faaliyetini meydanğa çıqaruv” aqqında malümat kampaniyasına esaslanğan edi.

İşğalciler onı, sözde “Qırım musulmanları davasınıñ dörtünci Bağçasaray gruppası” çerçivesinde “terror teşkilâtınıñ faaliyetini teşkil etmekte” qabaatladılar.

Apiske alınğan soñ

Apiste olğanda Seyran Hayretdinovnıñ sağlığı bayağı zayıflaştı. 2023 senesi onıñ ağır simptomları peyda oldı: bütün bedeninde eşken çıqtı, sıcağı köterilmege başladı, küçlü ağrılar ve yorğunlıq peyda oldı. Buña baqmadan, onı mahkeme oturışlarında iştirak etmege zorladılae, kerekli tibbiy yardım ise keç kösterildi.

Tek alı keskin sürette fenalaşqan soñ, onı vaqtınca hastahanege yerleştirdiler, amma tedaviylev bitirilmedi ve onı tezce SİZO-ğa qaytardılar. Neticede mabüs pek arıqladı ve bedenni uzun vaqıt zayıflaşmağa devam etti.

2023 senesi mayıs ayında rusiye mahkemesi siyasiy mabusnı 12 yılğa mahküm etti. O, birinci dört yılını apishanede, qalğan müddetini ise qattı rejimli koloniyada keçirmek kerek.

2024 senesi noyabrniñ 21-ne qadar qırımtatar rusiyeniñ novoçerkassk şeerindeki 3-nci SİZO-da tutula edi. Aynı şu yılı dekabr ayında o, qorantasına yazğan mektüpte, başqa yerge avuştırılmaq içün vaqtınca permdeki bir koloniyağa yerleştirilgenini haber etti, 2025 senesi yanvar ayında ise Seyran Hayretdinovnı Qırımdan 1500 kilometrden ziyade uzaqlıqtaki vladimirniñ merkeziy koloniyasına yolladılar, şimdi de mabüs anda bulunmaqta.