Apisten evelki yaşayışı

Sergiy Ofitserov Hersonda doğdı. Balalıqta ana-babasınen beraber Kamçatkağa köçti, soñra rusiye vatandaşlığını aldı. 1998 senesi Ukrayinağa qaytıp keldi ve ikâmet ruhsetnamesi alıp yaşay.

2014 senesinden soñ Sergiy öz balkonında milliy bayraqnı asıp, ukrayin muzıkasını diñlep, ukrayin tiline keçti. Üç yıl devamında o, rusiye vatandaşlığından çıqmağa tırıştı, amma bürokratik manialar sebebinden, tam miqyaslı ücüm başlanmazdan evel, bunı yapıp olamadı.

Sergiy ticaret saasında çalışa edi, soñra ise qapı yapmağa başladı. O, faal yaşayış tarzını alıp bara edi, sportnen meraqlana edi. Adam baydarkada yaldamaqnen oğraşıp, Dnipro boyu beş biñ kilometrden ziyade yol keçti. Soñra velosiped ayaqmaşna sportınen meraqlanmağa başladı.

Taqipler

Sergiy Ofitserov 2022 senesi avgust ayında Hersonda tutuldı. Rus arbiyleri babasınıñ avine keldiler, o vaqıtta Sergiy de anda buluna edi. Silâlı telükesizlik küçleri evge zornen kirip, adamnı yerge yatqızdılar, telefonınıñ kilitini açmağa mecbur ettiler ve onı qırçmanen evden çıqardılar. Bundan soñ onen alâqalar ğayıp oldı. Bir qaç afta devamında soy-sopları onıñ taqdiri aqqında iç bir malümat alamadılar. Soñra Sergiy aqqında onıñ yanında tutulğan bir adamdan haber aldılar. Anda bulunğan daa bir şaat, videolardan birinde Sergiyni daima işkencelerge oğratqanlarını ayttı. Sergiy sözde “Herson doquzlıssı” adlı dava boyunca tutulmaqta. Rusiye akimiyeti onı ve diger tutuqlarnı “terror teşkilâtında” iştirak etmekte qabaatlay.

Apisteki yaşayışı

Ondan soñ, Sergiy Ofitserovnı başqa tutqınlarnen beraber vaqtınca işğal etilgen Qırımğa, andan ise moskva SİZOsına alıp ketkenleri ortağa çıqtı. Bundan soñ onı rostov-na-donu şeerine avuştırdılar.

Rus esirliginde bulunğan vaqıt içinde, Sergiy resim yapıp başladı. Babasınıñ aytqanına köre, qorantası onıñ 80-ge yaqın resimini alıp olğan. Olarnıñ arasında Hersonnıñ manzaraları, portretler, mahkeme odalarınıñ resimleri bar.