Ukraina çetel işler Nazirligi ve Ukraina Prezidentiniñ Qırım Muhtar Cumhuriyetindeki Temsilciliginiñ teşebbüsi ile Ukrainanıñ vaqtınca işğal etilgen topraqlarında bulunuvını aqlamağa tırışqan Rusiyeniñ areketlerine qarşılıq kösterüv olaraq ”Ögren-Teşker-Areket et” informatsion leyhası başlandı. Çetelde ve şu cümleden Avropada yaşağan ortaqlarımıznı evelden sanktsiyalar aqqında haberdar etip, Ukrainanıñ vaqtınca işğal etilgen topraqlarında ticariy, medeniy ve siyasiy faaliyetlerine yol berilmeycegi aqqında tenbilemek kerekmiz.
Leyhanıñ ortaqları arasında halqara silâlı dava ve Ukrainanıñ vaqtınca işğal etilgen topraqlarında insan aqlarını qorçalav ile oğraşqan İnsan aqları oğrunda media teşebbüsi ve İnsan aqları boyunca Ukraina-Helsinki birligi cemaat teşkilâtları da bardır.
Esas vazifemiz ortaq devletlerimizniñ vatandaşı olaraq halqara sanktsion tertibini ya da Ukraina qanunlarını bozğan fizikiy ya da uquqiy şahısnı cezalamaq degildir. Böyle yapmaq kerekmiz ki, bu kibi bozuluvlar aqıllarına bile kelmesin. Ekseriy allarda bozuluvlar adamlarnıñ sanktsion sıñırlanuvları ve bozuluvlar ne olğanı aqqında haberleri olmağanından sebep yüz bere. Onıñ içün biz Ukraina çetel işler Nazirligi ve halqara teşkilâtlar ile beraber vaqtınca işğal etilgen topraqlarımızda bulunuvını aqlamağa tırışqan Rusiyeniñ areketlerine qarşılıq kösterüv olaraq ”Ögren-Teşker-Areket et” informatsion leyhasını başlattıq”, – dep izaatladı leyhanı Anton Korınevıç, Ukraina Prezidentiniñ Qırım Muhtar Cumhuriyetindeki Daimiy Temsilcisi.
AB devletleriniñ vatandaşlarını sanktiyalarğa oğramaqtan qorçalay bilecek adımlar:
📌 Rusiyege qarşı AB ve Ukraina tarafından qabul etilgen sıñırlamalarnı ögreniñiz.
📌 Rusiye ile çalışqanda, özüñizni ya da şirketiñizni problemlerden qorçalamaq maqsadınen malümatlarıñıznı teşkeriñiz.
📌 Rusiyeniñ Ukraina ile başqa AB devletlerine qarşı tecavuziy areketlerine yol bermemek içün areket etiñiz.
Halqara cemaat teşkilâtlarını, ticariy birliklerni, çetelde faaliyetlerini yürsetken ukrain derneklerini ve avropalı matbuat vastalarını leyhağa qol tutmalarına çağıramız:
📝 zenaatdaşlarıñız ile dostlarıñıznı leyhamızdan haberdar etiñiz;
📝 mevcut olğan AB sıñırlayıcı tedbirleri aqqında infografikanı endirip tarqatıñız:
https://cutt.ly/5vObHil
malümatnı içtimaiy ağlarda aşağıdaki işaretlemeler ile tarqatıñız:#LearnCheckAct, #Sanctions, #CrimeaIsUkraine
Avropa Birligi Rusiye Federatsiyasına qarşı sanktsiyalarını 2014 senesi Rusiye Qırımnı ve qısmen Ukrainanıñ Donetsk ve Lugansk vilâyetlerini işğal etken soñ qabul etti. Amma Rusiye Federatsiyası sanksiyalardan qaçınmaq ve Ukrainanıñ vaqtınca işğal etilgen topraqlarında bulunuvını aqlamaq maqsadınen Avropa cemiyetini ve ticariy şirketlerini aldatıp, olarğa işğal etilgen Qırımda qanunsız ceryanlarda iştirak etmege teklif etip başladı.
AB sanktsiyalarınıñ (ingliz tilinde) tolu cedveli