İşğalciler tarafından qanunsız şekilde 18 yılğa mahküm etilgen ve eki yıl bir buçuq ay qanunsız şekilde rusiyeniñ vladimir şeerindeki 2-nci apshanesinde tutulğan faal ve cemaat erbabı Enver Omerovnı, rusiyedeki mariy el cumhuriyetindeki yüksek havfsızlıq cezaevine avuştıralar. Al azırda mabüs rusiyeniñ kazan şeerindeki 19-ncı SİZOda tranzitte buluna.

Enver Omerov 10 iyün 2019 senesi qızınen beraber kiyevi – qırımtatar siyasi mabüsi Rustem İsmailovnıñ davası boyunca mahkeme oturışuvına keteyatqanda tevqif etildi. Enverni sebepsiz yerde “terrorcılıqta” qabaatlap, sözde “Qarasuvbazar gruppası” davasında qabaatlı dep tanıdılar. O kün tintivler vaqtında onıñ oğlu Riza Omerov da tevqif etildi. Rizanı işğalciler 13 yıl apis cezasına mahküm ettiler. Böyleliknen, bir qorantadan üç kişi aynı anda em siyasiy, em diniy, em de etnik sebeplerden basqılarğa oğratıldı.

Temsilcilik Ukraina vatandaşlarınıñ rus işgalcileri tarafından qanunsız şekilde apis etilmesini tenqit ete ve halqara toplulıqnı, bütün halqara uquq normalarını bozıp, qanunsız olaraq Ukraina vatandaşlarınıñ yerlerini deñiştirmege devam etken rusiyeniñ nevbetteki cinayetlerine qarşılıq köstermege çağıra.