Qanunsız şekilde 17 yılğa mahküm etilgen qırımtatar siyasiy mabüs Ayder Capparov, qanunsız olaraq rusiyedeki çelâbinsk vilâyetiniñ verhneuralsk apshanesinden arhangelsk vilâyetiniñ korâzma şeerindeki 5-nci koloniyağa avuştırıldı. Bundan da ğayrı, qanunsız şekilde 12 yılğa mahküm etilgen daa bir qırımtatar siyasiy mabüs Eskender Abdulganiyev, kemerovo vilâyetiniñ yugra şeerindeki 41-nci koloniyada sebepsiz yerde beş ay devamında ceza izolâtorında tutulğan soñ rusiyeniñ kemerovo şeerindeki 29-ncı koloniyağa keçirildi.

Bu sene fevral ayında Ayder Capparovnıñ 13 yaşındaki oğlu Abdulla rak hastalığından öldi. İşğalciler oğlunıñ cenazesine babasını yibermediler. Capparov, rusiyeniñ arhangelsk vilâyetindeki apishanede buluna, andaki qattı iklim siyasiy mabüsniñ sağlığına zarar ketire bile.

Eskender Abdulganiyevni daa yaramay şartları olğan koloniyağa yiberildi. Siyasiy mabüsniñ anası bildirgenine köre, onı rusiye vatandaşlığını almağa red etmesi sebebinden kemerovo şeerindeki koloniyağa avuştırğanlar. Eskender daima videokozetüv altında tek kişilik odada tutula, onı saba saat 5-tursatıp, kündüz oturıp olamasın dep, minderini alıp keteler. Bundan da ğayrı, advokatlarnıñ aytqanlarına köre, oña soy-soplarını körmege ve olarnen qonuşmağa yasaq etile, bunen beraber mabüs kezmege çıquv, soy-soplarından aşayt ve maddiy yardım aluv aqqından marum etile, bu sebepten o, pek azğan.

Ayder Capparov ve daa eki siyasiy mabus 2019 senesi “Qarasuvbazar gruppası” davası boyunca qanunsız şekilde mahküm etildi. Eskender Abdulganiyev – 2019 senesi, 21 yaşında olğanda, qırımtatar faalleriniñ rusiye telükesizlik quvetleri tarafından taqip etilgenlerini aydınlatqanı içün evinde keçken tintüvlerden soñ tutulğan eñ yaş siyasiy mabüstir.

Temsilcilik rusiye işğalcileri tarafından sistematik tarzda Ukraina vatandaşlarınıñ aqları bozuvlarını takbih ete ve halqara toplulıqnı Ukraina vatandaşlarını qanunsız köçürüv ve halqara gumanitar uquq normalarını bozıp, insanlarğa qarşı şidettini devam ettirgen rusiyeniñ mesüliyetke çekilmesine çağıra.