Qırım siyasiy mabüslerine qarşı taqipler ve insan aqları bozuluvlarını aydınlatqanı içün rus işğalcileri tarafından qanunsız şekilde 19 yılğa mahküm etilgen vatandaş jurnalist ve faal Remzi Bekirov rusiyeniñ krasnoyarsk eyaletindeki yeniseysk 2-nci apshaneden qanunsız şekilde başqa yerge avuştırıldı. Bu aqta apayı Halide Bekirova haber etti.

Siyasiy mabus apayına yazğan mektüpta onı apishaneden başta krasnoyarsk şeerindeki tranzit köçürilme noqtasına alıp keteceklerini, belli bir vaqıt anda qala bilecegini, ondan soñ ise büyük ihtimal, başqa bir yerge köçürilecegini bildirdi. Bundan evel işğalciler Remzi Bekirovnı evine yaqın bir cezahanege avuştırmaqnı red ettiler.

Remzi Bekirov 2019 senesi martnıñ 27-de, işğal etilgen Qırımda qırımtatarlarnıñ evlerinde olıp keçken toplu tintüvlerin vaqtında tevqif etilgen edi. O vaqıt 20 adam tutulıp, “terrorizm” iddiasınen qanunsız şekilge qabaatlanğan edi. Ondan soñ bir qaç kün içinde daa beş qırımtatarı tevqif etilip, “Qırım musulmanları davası” çerçivesinde mahküm etilgen edi. Olarnıñ arasında Remzi Bekirov da yer aldı.

Temsilcilik rusiye işğalcileri tarafından sistematik tarzda Ukraina vatandaşlarınıñ aqları bozuvlarını takbih ete ve halqara toplulıqnı Ukraina vatandaşlarını qanunsız köçürüv ve halqara gumanitar uquq normalarını bozıp, insanlarğa qarşı şidettini devam ettirgen rusiyeniñ mesüliyetke çekilmesine çağıra.