İşğalciler siyasiy mabüs Seyran Saliyevni qanunsız şekilde rusiyeniñ tula vilâyetindeki daa qattı tutuluv şartları olğan cezahanesine avuştırdılar. Bu aqta mabüsniñ ömür arqadaşı Mümine Saliyeva haber etti.

Saliyeva, bir aydan ziyade aqayınen bağ olmağanını, mektüplerine cevap berilmegenini bildirdi. Cezahane idaresi Mümineniñ muracaatına cevap olaraq, Seyrannı “cezahane tertibini bozğanında” qabaatlap, onı daa qattı şartları olğan yerge avuştırılacağını haber etti. Siyasiy mabüsniñ apayı bu areketlerni maqsatlı basqı dep adlandıra.

Seyran Saliyev türk ve qırımtatar tilleriniñ filologı, rehber, “Qırım birdemligi”niñ vatandaş jurnalistidir. O, işğalcilerniñ cinayetlerini aydınlatıp, siyasiy mabüslerge yardım ete edi.

2017 senesi oktâbrniñ 11-de Seyran Saliyev ve daa beş qırımtatarı “terrorizm”de qabaatlanıp tevqif etildi. 2020 senesi sentâbrniñ 16-da rus mahkemesi “Qırım musulmanları davası” dep adlandırılğan dava boyunca qararnı ilân etti. Qanunsız tevqif etilgenler 13 yıldan 19 yılğace mahküm etildi. Seyran Saliyev 16 yıl apis cezası aldı, soñra ceza bir yılğa 15 yılğa tüşürildi.

2019 senesi Avropa parlamenti ukrain siyasiy mabüsleriniñ, şu cümleden Seyran Saliyevniñ azat etilmesi içün beyanname qabul etken edi.

Temsilcilik rusiye işğalcileri tarafından sistematik tarzda Ukraina vatandaşlarınıñ aqları bozuvlarını takbih ete ve halqara toplulıqnı Ukraina vatandaşlarını qanunsız köçürüv ve halqara gumanitar uquq normalarını bozıp, insanlarğa qarşı şidettini devam ettirgen rusiyeniñ mesüliyetke çekilmesine çağıra.