Rusiye cenübiy bölge arbiy mahkemesi 26 yaşındaki Aqmescit sakini Alina Grekni 15 yıl umumiy rejim koloniyasında qalmasına üküm etti. Onı “devlet hainligi”, “terroristik areketke azırlanuv” ve “terroristik faaliyetke ögrenüv”de qabaatladılar.

Rus “mahkemesiniñ” malümatına köre, üküm 2025 senesi avgustnıñ 14-nde ilân etildi, mahkemeci – pavlo gubarev. 2024 senesi yanvarniñ 22-nde Alina Grekni tutıp aldılar, onıñ soyadını ise “terroristler ve ekstremistler” cedveline kirsettiler. Rusiyeniñ “ekstremistler cedvelinde” o, “muhalefet gençlik teşkilâtınıñ azası” olaraq qayd etilgen. Alinanıñ şahsiy “VKontakte” saifesinde , tuvğan şeer qısmında Aqmescit, Ukraina yazılğan.

Alina Grekniñ davası, işğal etilgen Qırımda rusiye tarafından yapılğan qanunsızlıq ve terror siyasetiniñ daa bir tasdıqıdır. 2014 senesinden başlap, işğalciler vaqtınca işğal etilgen yarımadada Ukraina vatandaşlarına qarşı büyük repressiv kampaniyanı alıp başlatalar. Misal olaraq, Kreml zapt etilgen topraqlarda qanunsız şekilde öz “qanunlarını” kirsetip, cinaiy uquqnı terror aleti olaraq qullana; işğalci rejimge eñ küçük isyan ya da tirenüv, uydurılğan qabaatlavlar boyunca em memuriy, em de cinaiy taqipke sebep ola. İşğal etilgen Qırımda böyle bir ameliyat endi sistemalıdır. Avgustnıñ 18-nde işğalciler 220 insannı qanunsız sürgün etti, olardan 133 qırımtatarı.

Temsilcilik Rusiye işğalci memleketiniñ qanunsız areketlerini takbih ete ve qanunsız apis etilgenlerniñ deral azat etilmesini talap ete. Qırımnıñ azat etilmesi vatandaşlarımıznıñ havfsızlığını temin etecek ve işğalcilerniñ 12 yıldan berli yapqan cinayetleri neticesinde devam etken insan taqdiriniñ yoq etilmesini toqtatacaq. Ukraina vatandaşlarınıñ rf cinaiy kodeksiniñ 275-nci maddesi boyunca taqip edilmesi aqqında saifemizde oquñız: https://cutt.ly/QrH2Kc1I