Bugün Qırımda işğalciler qanunsız tutulğan qırımtatarı Dilâver Salimovnı koloniyağa yolladı. İşğalci “mahkeme” sebepsiz şekilde Salimovnı sözde “öldürmeknen qorquzuv” iddiasınen qabaatladı.

Salimovnı işğalci telegram-kanalı içün afu soramağa teklifni red etkeninden soñ qanunsız olaraq tevqif ettiler.

Dilâver Salimov keçken sene yazda Eski Qırım şeerinde bir adamnen laf etkende üstünde olğan “Z” işaretli şapkasını tenqit etken edi. Bu vaqianı birileri çekip, işğalci telegram-kanallarına yollağan.

Video yayınlanğan soñ Salimovğa qarşı sözde “kiçik çapqınlıq” içün memuriy dava açıldı: Aqmescitniñ işğalci “mahkemesi” Salimovğa 15 künlük nmemuriy apis cezasını belgiledi ve 4000 ruble cöreme töletti. Bir propaganda telegram-kanalınıñ saipleri aqayğa kamera ögünde afu soratacaq oldılar. Qırımtatarı bu teklifni red etken soñ, oña qarşı “öldürmeknen qorquzuv” maddesine köre cinaiy dava açıldı ve qabaatlavı quvetleştirildi.

İşğalciler nevbetteki kere Qırımda Ukraina vatandaşlarınıñ aq-uquqlarını boza. 2024 senesi aprel ayına qadar işğal etilgen yarımadada ruslar işğalci ordunıñ sözde “itibardan tüşürüvi” aqqında 737 qanunsız protokol tizdi.

Halqara toplulıqnı tecavuzcı devletniñ areketlerine qarşılıq köstermege ve işğal etilgen Qırımda Ukraina vatandaşlarınıñ devamlı taqiplerini takbih etmege çağıramız.