Qanunsız şekilde mahküm etilgen qırımtatarları, hususan Zekirya Muratov, Osman Arifmemetov, Rustem Şeyhaliyev, Ruslan Suleymanov ve Enver Ametovnı, işğalciler nevbetteki kere rusiyedeki cezahanelerge etap etti.

Qanunsız şekilde 11 yıl apis cezasına mahküm etilgen qırımtatarı Zekirya Muratov, qızı tarafından berilgen malümatqa köre, rusiyedeki saratov vilâyetiniñ balaşov cezahanesinden nijniy novgorod şeeriniñ № 5 tüzetüv cezahanesine avuştırıldı. Muratov, 2020 senesi iyül ayında Aluşta şeerinde tevqif etilgen edi. Mabüsniñ bir sürü hastalıqları bar – qan basımı, yürek yetersizligi, yürek qusurı, bundan sebep ket-kete mabüsniñ adaleleri irimege başladı. 2021 senesi yazda, SİZO-da, o, COVİD-19 oldı, adamnı eki taraflı pnevmoniyanen ağır alda apishaneniñ hastananesine yatqızdılar.

Qanunsız şekilde 14 yılğa mahküm etilgen Osman Arifmemetov, martnıñ 18-nde novoçerkaskniñ №3 SİZO-sından krasnoyarsk bölgesiniñ cezahanesine etap etildi. Bu aqta mabüs, qorantasına yollağan mektüpte haber etti:

“Men ve Rustem, ğaliba, krasnoyarsk bölgesine ketecekmiz, Ruslar – çelâbinsk vilâyetine”. 

Aynı zamanda, onen beraber Rusten Şeyhaliyev, Ruslan Süleymenov ve Enver Ametov da farqlı şeerlerge etap etildi. Olarnıñ episi başta voronej şeerine ketirildi, soñra ise Ametovnı lipetskke, qalğanlarnı ise samarağa yolladılar.

Adamlar 2019 senesi mart ayında tevqif etilgen edi. O vaqıt, onlarca qırımtatar evlerinde aynı vaqıtta qanunsız tintüvler olıp keçti. Qanunsız tevqif etilgenlerden aman-aman er kes jurnalist ya da cemaat faali edi.

Temsilcilik Ukraina vatandaşlarınıñ rus işgalcileri tarafından qanunsız şekilde apis etilmesini tenqit ete ve halqara toplulıqnı, bütün halqara uquq normalarını bozıp, Ukraina vatandaşlarını etap etmege devam etken rusiyeniñ nevbetteki cinayetlerine qarşılıq köstermege çağıra.