Bugün saba Bağçasarayda  işğalci FSB hadimleri siyasiy mabus Seyran Saliyevniñ anası Zodiye Saliyevanıñ evine kirip, onı belli olmağan yerge alıp kettiler.

Saba saat 7-de qadınnıñ evine kelgen işğalcilerden birisi evge kirip, onen bayağı qonuştı, üçü ise maşnada oturdı. İşğalci “mahkemeniñ” qanunsız “qararı” ile işğalciler  sözde “teftiş” keçirmege planlaştırğan, amma vasiqada yañlış adres yazılğan emiş. Soñra, Zodiye Saliyevanıñ cep telefonı alıp, onı Aqmescitke alıp ketkenleri belli oldı. Advokat Edem Semedlâyev Aqmescitke işğalci FSB binasına uquqiy yardım köstermek içün keldi. O, nevbetçige muracaat etip, kiriş yanında bekley.

Şimdi Mümine Saliyeva Aqmescitte işğalci FSB binası yanında bulunmaqta. Zodiye Saliyevağa qol tutmaq içün binağa siyasiy mabuslerniñ anaları ve lâqayt olmağanlar kelip çıqtı.

İşğalci müessise qadınnıñ vaziyeti ve bulunğan yeri aqqında iç bir malümat bermey. Mümine Saliyeva işğalci İçki işler nazirliginde insannıñ ğayıp oluvı ve qaçırılması aqqında beyanat berdi.

Saat 14:45-te faa Zodiye Saliyeva işğalci “Qırım FSB bölüginden” çıqtı. FSB hadimleri faalge malümatnı açıqlamamaq aqqında beyanname imzalatıp, cep telefonını musadere ettiler.