Birleşken Milletler Teşkilâtınıñ İqtisadiy ve İçtimaiy Şurası tamır halqlar aqqında daimiy forumnıñ maruzassını ve tevsiyelerini tasdiqladı, anda rusiyeniñ tecavuzı tamır halqlarnıñ aqlarını ömürge keçirüvge doğrudan-doğru zarar ketirgeni qayd etile. Bu müim bir vaqiadır, çünki asılında BMT Baş Assambleyasından ğayrı, BMT sistemasındaki daa bir qurulış rusiye tecavuzınıñ tamır halqlarnıñ aqlarını serbest qullanmaq qabiliyetine menfiy tesir etkenini ilân etti. Bu aqta bu sene forumnıñ maruzacısı olaraq saylanğan Birleşken Milletler Teşkilâtınıñ Daimiy Forumınıñ azası Suleyman Mamutov qayd etti.

Bu sene çıqarılğan maruzada birinci kere Ukrainanıñ üç tamır halqı – qırımtatarlar, qaraylar ve qırımçaqlar añıla. Maruzada bu halqlarnıñ rus tecavuzı sebebinden ciddiy zorluqlarnen qarşılaşqanı tanıla, olarnıñ aqlarını, şu cümleden öz taqdirini tayin etme aqqını ömürge keçirüvdeki qıyınlıqlar ve tilleriniñ ğayıp olma telükesi qayd etile.

Maruzada esas tevsiyeler, şu cümleden dekolonizatsiya, tamır halqlarnıñ öz taqdirini tayinleme ve muhtariyer aqqı, bundan da ğayrı doğrudan-doğru maliyeviy teminlev ve tamır halq temsilcileri olğan yaşlarınıñ siyaset saasında iştirak etüvi temin etilmesi kerekligi aqqında söz yürsetile. Bundan da ğayrı, tamır halqlarnıñ BMT-de, şu cümleden Baş Assambleya ve İnsan aqları şurasında iştirak etüvi destenlenmesi kerekligi qayd etile.

Hatırlatamız, Daimiy Forum BMT sistemasınıñ esas organıdır, o, tamır halqlarnıñ aqlarını qorçalavğa diqqat ayıra ve bütün dünya boyunca tamır halqlarnıñ vaziyetini aydınlata, devletlerniñ siyasetleri ve BMT sistemasınıñ faaliyeti aqqında malümat bere.