Keçken afta olıp keçken esas vaqialar:

▶ Keçken afta içinde dekabr 15-te Keriç boğazında eki rus tankeriniñ qazası sebebinden meydanğa kelgen ekologik felâket neticesinde peyda olğan neft çıtası bayağı büyükleşti: Aya burnundan başlap, Foros burnuna qadar, Yalta körfezinde, Gurzuf yanlarında, Ayu-Dağğa ve Donuzlav gölü ile Qara deñiz arasında köpür vazifesini becergen Bilâus beline qadar tarqaldı. Bundan ğayrı, yanvarniñ 9-nda Qırımnıñ Kezlev rayonında, hususan, Çeger Acı köyü yanında yalı boyunda da lekeniñ izleri qayd etildi. Felâketten soñ umumen 260,28 tonnağa yaqın kirli qum toplanıp çıqarıldı.

▶ Açıq menbalardan alınğan malümatqna köre, yanvarniñ 10-nda işğal etilgen Qırımda, hususan Keriçte patlama sesleri eşitildi.

İşğal cinayetleri: 

▶ Yanvarniñ 13-ne qadar işğaslciler qanunsız şekilde 218 insannı tutıp aldı, olar arasında 132-si – qırımtatarı. Umumiy sayıdan 43 – tevqif etildi (28-i qırımtatarı), 151 – mahküm etildi (97-i qırımtatarı), 26 kişi – statussız (olar arasında 6-sı qırımtatarı).

▶ Vaqtınca işğal etilgen Qırımda, sözde “makemelerge” rusiye federatsiyası Memuriy uquq bozuvları kodeksiniñ 20.3.3 maddesine köre tizilgen 1139 protokol kelmesi qayd etildi. Olar arasında 1022 adisede para cezası şeklinde memuriy ceza berilmesi ya da başqa davağa qoşulıp, umumiy tedbir çıqarılması aqqında qarar berildi. 42 adise alâ daa baqıla.

▶ Rusiyeniñ rostov-na-donu mahkemesi Aqyar sakini Kostantın Gorpınçenkonı Ukraina Telükesizlik Hızmeti ile işbirlik yapıp kerginlik relelerini yaqmağa tırışqanı aqqında uydurma qabaatlavlar esasında qattı rejim 11 yıl apis cezasına mahküm etti. 

▶ İşğalciler tarafından qanunsız şekilde 17 yılğa mahküm etilgen, 2024 senesi dekabr ayında ise Aqmescitteki SİZO-1-den koloniyağa avuştırmaq içün çıqarılğan soqur siyasiy mabüs Oleksandr Sizikov şimdi volgogradda tranzitte bulunmaqta.

Zorlavnen seferberlik:

▶ Rusiye ordusınıñ eñ az 1657 askeri defin etildi. Olar arasında 1117  kişi ihtimal Ukraina vatandaşı. Defin etilgenlerniñ sayısı daa çoq ola bile, çünki definlerniñ çoqusı gizli şekilde yapıla. 

▶ İşğal etilgen Qırımdan eñ az 101 rf arbiy hadiminiñ esirge alınğanı tasdıqlandı, olarnıñ çoqusı ihtimal Ukraina vatandaşı.

Qırım yarımadasınıñ askeriyleştirüvi:

▶ “ATEŞ” areketiniñ faalleri Qırımdaki işğalcilerniñ bulunuv yerlerinde istihbarat keçirmege devam eteler. Hususan, Aqmescit yanındaki Sarabuz arbiy uçaq aanında faaller, ava mudafaa sistemalarınıñ, şu cümleden S-400 raketalarnıñ ve radar stantsiyalarınıñ artmasını qayd eteler. Kezlevdeki ise agentler taşlanğan yüksek qatlı binada közetüv noqtaları, arbiy tehnika ve qorumalarnı qayd ettiler, bundan ğayrı, Kezlev rayonında Morska soqağındaki bir sanatoriy binasında çoq sayıda tehnika, quvetleştirilgen qoruma ve arbiy gruppalarnen pekitlgen işğalci ştab tapıldı. Bundan ğayrı, Canköy yaqınlarında, büyük arbiy tehnika kolonnasınıñ areketi qayd etildi, onıñ terkibinde arbiyler, artilleriya, benzin tsisternaları, ava mudafaa sistemaları içün arbiy yedekler körüldi.

İşğalcilerniñ propagandası ve duşmanlıqnı qızıştırma:

▶ Yanvarniñ 7-nde “Taygan” arslan parkında mazut zeerlenüvnden ölgen 68 quşnıñ yaqılğanı aqqında haber berildi, olarnıñ çoqusı zeerlenüvni keçirip olamağan batağan ve pupladır. Yanvarniñ 7-ne köre, parkta 400-ge yaqın quş bulunmaqta.

Cemaat qarşılığı:

▶ İşğalci telükesizlik küçleri Canköy sakini Oleksiy Silinni qomşusınıñ evinden rus bayrağını çıqarıp, taptağanı içün onı tevqif etip, afu soramağa mecbur ettiler.

▶ “Jovta striçka” (“Sarı şerit”) areketiniñ faalleri Qırımnıñ rus işğaline narazılıq bildirip, Ukrainağa sarsılmaz sadıqlıq köstermege devam eteler. Olar yarımada sakinlerini ukrain simvollarını tarqatıp, vatanperver graffitiler yaratıp, fleş-moblar teşkil etip, istilacılarnıñ teşviqat materiallarını yoq etip, zorbalıqsız qarşılıq kösterüvge qoşulmağa çağıralar. Taqip telükesi olğanına baqmadan, iştirakçiler ukrain hatıra yerlerini yañıdan tikleyler, informatsion aktsiyalar keçireler, Qırım Ukrainanıñ ayırılmaz bir qısmı olaraq qalğanını daima qayd eteler ve başqalarnı da yarımadanıñ azat etilmesi içün umumiy küreşke qoşulmağa ruhlandıralar.

▶ “Krımski boyovi çaykı” (“Qırımnıñ cenkâver çağalaları”) areketiniñ iştirakçileri vaqtınca işğal etilgen yarımadada satqınlarnıñ ve işğalcilerniñ şahsiy malümatlarını bildirmege devam ete. Olar er kün telükege baqmadan, bu şahıslarnıñ yaşağan yerleri, seyaat yolları, maddiy areketleri, işğalci idaresinen bağları aqqında pek müim malümatnı diqqatnen araştıra ve yetkizeler. Bundan ğayrı, faaller gizli qarşılıq aktsiyalarını teşkil eteler, ukrain timsalleri olğan listovkalar tarqatalar, yerli işbirlikçiler ve satqınlar arasındaki qabarcılıq kelişmelerini meydanğa çıqaralar.

▶ “Zla Mavka” (“Açuvlı Mavka”) qarşılıq areketiniñ faalleri vaqtınca işğal etilgen Qırımda aq-uquqları içün küreşini alıp barıp, yarımada soqaqlarını narazılıq noqtalarına çevirmege devam eteler. Ukrainağa qoltutuv grafitileri, yarlıçıqlar ve bildirmeler vastasınen olar ukrain ruhunıñ küçüni köstere, işğalcilerniñ bütünley nezareti aqqında yañlış teessuratlarnı yoq eteler. Olarnıñ faaliyeti rus propagandasını meydanğa çıqarmaq ve bölgede insan aqları bozuluvlarına diqqat çekmege yönelgen. Areketniñ cesür iştirakçileri qırımlılarnı ruhlandıralar, yeñilmez küçniñ timsali olıp, mustaqillik oğrunda küreş devam eteyatqanını, yarımadanıñ azat etilmesi tek vaqıt meselesi olğanını hatırlatalar.

Temsilciligimizge, işğalge ve total propagandağa dayanalmayıp Qırımdan ketmege istegen Ukraina vatandaşlarından mektüpler  kelmege devam etmekte. İşğal etilgen Qırımdan çıqış hususında talimatnamemiz aqqında hatırlatamız: https://cutt.ly/FwtiajlS

İşğal etilgen Qırımda yaşağan ve yarımadadaki vaziyet, içtimaiy-iqtisadiy vaqialar, rus ordusınıñ yerini deñiştirüvi, qarşılıq areketleri ve başqa adiseler aqqında haber etken añlayışlı Ukraina vatandaşlarına teşekkürlerimizni bildiremiz. Tafsilâtlı malümatnı Temsilcilikniñ matbuat hızmetiniñ e-mail adresine yollañız: [email protected].    

Ukrainağa şan-şüret!