ESAS MEVZULAR:
▶️ İşğalci quvetler martnıñ 13-nde qırımtatar faali, Qırımtatar Milliy Qurultayınıñ teftiş komissiyasınıñ azası Edem Dudakovnıñ evinde qanunsız tintüv keçirdiler. Tintüvden soñ faalni “Aqmescitteki FSB idaresine” alıp kettiler ve onı çıqarmadan evel bir qaç saat anda tuttıllar.
▶️ 12 yılğa mahküm etilgen qırımtatarı Eskender Abdulganiyev Kemerovo vilâyetindeki №41 apishanesine kelir-kelmez, ceza izolâtorına yerleştirildi. Eskender mektübini martnıñ 6-nda yollağan olsa da, cezahanege bir ay evel – fevralniñ 14-nde kelgen. Kelgen künü de onı ceza izolâtorına qapatqanlar.
İşğal cinayetleri
▶️ Martnıñ 18-ne qadar, Qırımda 217 insan qanunsız şekilde mahküm etildi, olar arasında 134 qırımtatarı. Umumiy miqdardan mahküm etilgenler arasında 33 insan tevqif (22 – qırımtatarı), 149 ise apis etildi (olardan 99 qırımtatarı), 26 kişi – statussız.
▶️ Martnıñ 18-ne qadar, vaqtınca işğal etilgen Qırımda işğalci makemelerde rusiye federatsiyası Memuriy uquq bozuvları kodeksiniñ 20.3.3 maddesine köre protokol tizilgen 699 vaqia qayd etildi. Olar arasında 612 adisede para cezası şeklinde memuriy ceza berilmesi ya da başqa davağa qoşulıp, umumiy tedbir çıqarılması aqqında qarar berildi. 11 adise alâ daa baqılmağa devam etile.
▶️ Ulan-Udeniñ №8 cezahanesine yiberilgen iş adamı Arsen Abhairov, advokatına tiş ağrısı ve ihtisaslı stomatologik yardımınıñ olmağanı aqqında aytıp berdi. Bundan da ğayrı, Abhairovnıñ varikoz hastalığı bar. Mabus Krasnoyarsk vilâyetiniñ Yeniseyska apishanesinden Burâtiya cezahanesine avuştırılğan soñ onıñ vaziyeti ağırlaştı.
▶️ İşğalciler, bir yıl evelsi “Oy u luzi çervona kalına” yırınıñ bir qaç variantını YouTube kanalınıñ diñleme cedveline qoşqan Aqmescit sakinine 8 kün apis cezası berdi. İşğalci “makeme” Memuriy uquq bozuvları kodeksiniñ 20.3 maddesine köre onı “natsizm simvolikasınıñ kösterilüvi” içün qabaatlı dep tanıdı. İşğalci “makeme” sözde “ekstremizm qarşılığı merkeziniñ” protokolı ve merkezniñ operativ hadimi çıqarğan malümatname esasında qadınğa apis cezası çıqardı.
▶️ Lipetsk vilâyetiniñ Yelts şeerindeki şahsiy hastahane ekimleri siyasiy mabus Vladlen Abdulkadırovda bel qısmında yer deñiştirüv, yanğı ve qıyıldıq tapqanlarını bildirdi.
▶️ İşğalci “makeme”, sözde “Qırım musulmanları davasında” keçken siyasiy mabus Eldar Yakubovnıñ apayı Ayşe Yakubovanı makeme zalında aqayınıñ fotoresimini çekkeni içün oña qarşı qanunsız şekilde tizilgen memuriy protokolğa köre para cezası kesti.
Qırım yarımadasınıñ askeriyleştirüvi
▶️ “ATEŞ” faalleri Qırımda işğalcilerniñ arbiy tehnikasınıñ areketlerini ve yerleşüvini taqip etmege devam ete. Olar cebege yiberilecek rus tehnikasınıñ “Aqmescit” demiryol stantsiyasına ketirilgenini bildirdi. Bundan da ğayrı, “ATEŞ” Aqyardaki Belbek uçaq alanı yaqınlarında işğalcilerniñ raketa anbarını taptı. Faallerge köre, anda Р-73, Р-27, Р-37 kibi raketalar ve Ukraina şeerlerine urmaq içün qullanılğan başqa donatuv tutula. “ATEŞ” ayrıca, işğalci quvetlerniñ Ukraina Silâlı quvetlerini aldamaq içün sahte anbarlar yaratqanları aqqında bildirdi… Ondan ğayrı, aktivistler Anğarada rus flotunıñ 126-ncı ayrı yalı muafaza brigadasınıñ yerleşüv yerini tapıp oldı. Faaller, arbiy qısımnıñ yanında çoq asker bulunğanını, olardan çoqusınıñ yerli olmağanını, aktsenetleri ve formalarındaki simvolikanıñ farqlı olğanını belgiledi.
▶️ 12 ve 13 mart künleri Aqyar Körfezindeki poligonda rus askerleri atış meşğuliyetlerini keçirdi, bu cümleden qol granatası atışları da ötkelirldi. Ondan da ğayrı, oqutuvda Şimal ve Cenüp iskeleleri bölgesinde işğalciler tarafından suvastı diversiyalarına qarşı esaplama bilgileri berildi.
Zorlavnen seferberlik
▶️ Rusiye ordusınıñ eñ az 745 askeri defin etildi. Olar arasında 555 kişi ihtimal Ukraina vatandaşı. Defin etilgenlerniñ sayısı daa çoq ola bile, çünki definlerniñ çoqusı gizli şekilde yapıla.
▶️ İşğal etilgen Qırımdan eñ az 42 rf arbiy hadiminiñ esirge alınğanı tasdıqlandı, olarnıñ çoqusı ihtimal Ukraina vatandaşı.
İşğalci memuriyetleriniñ propagandası ve duşmanlıqnı qızıştırma
▶️ Ukraina Mudafaa Quvetleriniñ rusiye Qara deñiz flotuna qarşı muvafaqiyetli uruvlarından soñ, rusiye arbiy-deñiz flotunıñ sözde yolbaşçısı admiral Nikolay Yevmenov istifa etti.
▶️ İşğalciler “Qırımda milletlerarası muabbetlik meselelerine büyük diqqat ayırğanlarını” köstermek içün “yarımadanıñ repressiyalarğa oğratılğan halqlarınıñ reabilitatsiyası aqqında qararnıñ on yıllığını” qayd etmek isteyler, amma aynı zamanda vaqtınca işğal etilgen Qırımda qırımtatarlarnıñ evlerinde er afta qanunsız tintüvler olıp keçe.
▶️ Rusiye matbuat vastaları, Qırımda sözde “saylavlarğa” insanlarnıñ 89,76% qoşulğanını bildirdi, olarnıñ 93,6% da sanki Putinge rey bergen. İşğalciler yarımadanıñ işğalini qanuniyleştirmek içün kene de uydurmalarını tarqata. Onıñnen beraber, 800 halqara közeticiden tek 5, o da şübeli közeticiniñ iştirak etmesi aqqında haber etile.
▶️ Rus işğalcileri propagandasınıñ “quvetini” daa bir kere kösterip, kütleviy şekilde sözde “qavuştıruv” tedbirlerini keçirmege istediler. İşğalciler studentlernen bücet işçilerini toplap ketirdiler, olar ise öz nevbetinen tahminen 20 daqqa bayraqlarnen sallap, tarqaldılar. Bu vaqia, ruslarnıñ ne qadar uydurılğan bir kerçeklerde yaşağanlarını daa bir kere köstere, aynı zamanda Qırım sakinleri propagandacılardan endi bezdi.
İşğalci matbuat vastalarınıñ yayınları
Bu afta Qırımda işğalci memuriyetlerniñ “temsilcileri” tarafından açıq şekilde tarqatılğan rusiyeniñ propanda añlavtuvları:
▶️ “Rusiye ükümet başınıñ emrine köre, 2024 senesi Qırım Cumhuriyeti “qazlaştıruv programması” çerçivesinde qoşma olaraq tahminen 20,9 mln ruble alacaq”, – dep, haber etti işğalci memuriyetniñ “hadimi”. Bu, işğalden soñ Qırımnıñ moskvadan qoşma masraflar talap etken dotatsiyalı bölgege çevrilgenini daa bir kere köstere.
▶️ Aqyarnıñ sözde “valisi” Aqyar mektebinde talebelerniñ rus işğalcisinen körüşüvi vaqtında çekilgen videonı yayınladı. Bu videoda, Qırımda balalarnı rus işğalci askerleri içün mektüp yazmağa zorlağanlarını da körmek mümkün.
▶️ Qanunsız qurulğan “qırım köprüsine” ola bilecek darbeler aqqında müzakereler alıp barğan işğalci memuriyetlerniñ “temsilcileri” Almaniyanı tehdit etmege devam eteler: “rusiye, Almanıya parlamentine, mustaqil tahqiq alıp barmaları içün ve Almaniyanıñ, onıñ yüksek rutbeli zabitleriniñ memleketimizge qarşı darbeler meselelerine celp etilmesinen bağlı mevzunı araştırıp öğrenmelerine davet etemiz”. İşğalciler nevbetteki kere manipulâtsiya etmege ve halqara toplulıqnı özek kerginleşüvnen qorquzdırmağa başladılar.
▶️ İşğalciler Qırımnıñ işğaline azırlıqlar daa Şuralar Birliginiñ dağılmasından başlanğanı aqqında nevbetteki mifni tarqata: “Qırım baari” birleştirüv ani oldı, amma bu bir improvizatsiya degil edi. Qırımnıñ Ukraina terkibinde olğanı yıllar boyunca bile “Qırım baari” azırlıqları yapıldı.
İçtimaiy ruh
▶️ İşğalci “makeme“ Hersonnıñ işğalcilerden qurtarılması aqqında içtimaiy ağlarda yazı yazğan Qırım sakinine cöreme töletti. Bu yazını ruslar “öz silâlı quvetlerini itibardan tüşürüv” olaraq körip, qadınğa qanunsız şekilde 30 biñ ruble cöreme kesti.
▶️ Aqmescitte yerli sakin qanunsız “saylavlarğa” narazılığını köstermek içün bülleten qutusına zelönka tökti. İşğalciler qadınğa qarşı cinayet davası açtı.
▶️ İşğal etilgen Aqmescitte “Jovta striçka” (“Sarı şerit”) areketiniñ aktivistleri soñ bir aftada eki biñden ziyade saylavlarğa teşviqat materiallarını, gazeta ve sahte saylavlarğa davetnamelerni yaqtı. Faaller işğal etilgen topraqlarda qanunsız “saylavlarnı” boykot etmege çağıra.
▶️ “Krımski boyovi çaykı” (“Qırımnıñ cenkâver çağalaları”) faalleri işğal etilgen Qırımda qanunsız “saylavlarnı” teşkil etken satqınlarnıñ şahsiy malümatlarını meydanğa çıqara.
▶️ “Zla Mavka” (“Açuvlı Mavka”) qarşılıq areketi işğalcilerniñ propaganda materiallarını yaqmağa, kündeliklerini alıp barmağa ve işğalcilerniñ cinayetlerini meydanğa çıqarğan aftalıq mecmuanı derc etmege devam ete.
Ukrainağa şan-şüret!