Afta içinde olıp keçken esas vaqialar:
▶ Ukrayina Silâlı Quvetleriniñ Baş ştabı duşmannıñ avadan qorçalanuv obyektleri, hususan “Nebo-U” radar stantsiyası ve “Pantsir-S1” zenit raketa-top kompleksiniñ yoq etilgeni aqqında haber etti.
▶ Pilotsız sistemalarnıñ küçleri region sanayınıñ energiya teminatınıñ eñ müim elementi olğan “Azovskaya” ast stantsiyasına ücüm ettiler.
▶ “Sarı şerit” (“Jovta striçka”) faalleri vaqtınca işğal etilgen Aqmescitteki Semaşko hastahanesinde yasaq etilgen antibiotikler qullanılğanı aqqında haber ettiler. Bu İsdistanda çıqarılğan “Tsefoperazon” ve “Sulbaktam Codas” ilâclarıdır, olar keçken yılnıñ fevral ayından başlap, bozuvlar belli olğanı ve hastalar içün olabilgen telüke sebebinden “qara cedvelde” bulunalar.
İşğal cinayetleri:
▶ Yanvarniñ 19-na qadar işğalciler qanunsız şekilde 224 insannı tutıp aldı, olardan 133 – qırımtatarı.
▶ 2026 senesi yanvarniñ 19-na qadar vaqtınca işğal etilgen Qırımda “rusiye federatsiyasınıñ silâlı quvetlerini itibardan tüşürüv” aqqında rf memuriy cinayetler kodeksiniñ 20.3.3 maddesine köre açılğan 1664 dava qayd etildi. 1542 davada para cezalarınıñ berilmesi ya da davalarnıñ birleştirilmesi aqqında qarar alındı. 9 davanıñ baqılması devam ete. Qararlarnıñ 53% (816) qadınlarğa qarşı, 47% (724) erkeklerge qarşı çıqarıldı.
▶ 13 yılğa apis cezasına mahküm etilgen qırımtatar siyasiy mabüs Yaşar Muyedinovnıñ apayı aqayınıñ rusiye federatsiyasınıñ arhangel vilâyetindeki 5-nci sanlı ceza koloniyasından arhangelsk şeerindeki 4-nci sanlı SİZOğa avuştırılğanı aqqında haber etti.
▶ İşğalci memuriyet siyasiy mabüs Volodımır Yakimenkonıñ rusiye ceza koloniyasında qaluvını daa eki aftağa qanunsız şekilde uzattı. Siyasiy mabüsniñ apayınıñ aytqanına köre, Yakimenkonıñ qursaq ağrısı daimiy suvuq, dımlıq ve antisanitariya şaraitleri sebebinden daa da fenalaşmaqta, amma oña tibbiy yardım kösterilmey. Ayrıca onıñ apayı, koloniya idaresi apishane ğıdasından ğayrı er angi bir aşayt mallarını köçürmege yasaq etkenini, göñüllilerden kelgen yemeklerni bayram künleri ve “işlemegen” poçtağa esaslanıp, üç aftadan berli dağıtmağanlarını qayd etti.
▶ Qırımnıñ işğalci “idaresi” qırımtatar jurnalistini ve “Merkez Plus” qırımtatar tok-şousınıñ alıp barıcısına eki memuriy madde boyunca 33 biñ ruble (tahminen 18 biñ grivna) cöreme töletti. Hususan, iddia etilgen “ekstremizm” qabaatlavınıñ esasında Dülberniñ müellifdeş olğan “Siyasiy meydannıñ transformatsiyası şaraitlerinde qırımtatarlar” adlı ilmiy iş oldı. Eser İvan Franko adına Qırım ilmiy kitaphanesinde saqlanıla edi. Onda, sözde “mutehassıslar” işğalciler tarafından “Qırım musulmanlarınıñ davası” dep adlandırılğan davağa sebep olaraq qullanılğan “Hizb ut-Tahrir” teşkilâtınıñ ve Qırımtatar Milliy Meclisiniñ “faaliyetini aqlağan” parçalarnı tapqanları iddia etile.
Zorlavnen seferberlik:
▶ Rusiye ordusınıñ Qırımda bulunğan bölüklerinden eñ az 2615 asker öldi. Olar arasında 1400 kişiniñ Ukraina vatandaşı olğanı tahmin etile.
▶ İşğal etilgen Qırımdan eñ az 125 rf arbiy hadiminiñ esirge alınğanı tasdıqlandı, olarnıñ çoqusı ihtimal Ukraina vatandaşı.
Qırım yarımadasınıñ askeriyleştirüvi:
▶ “ATEŞ” areketiniñ faalleri Aqmescitniñ civarında duşman obyektiniñ tafsilâtlı istihbaratını keçirdiler, işğalciler onı radio ava dalğalarını idare etmek ve yarımadadaki ukrayin qarşılığınıñ iştirakçilerini belgilemek içün signallarnı qapatmaq içün qullanalar.
İşğalci memuriyetleriniñ propagandası ve duşmanlıqnı qızıştırma:
▶ “Aleksandr Nevskiy soborınıñ” sözde ruhanisi Aleksandr Harin vaqtınca işğal etilgen Qırımda gece ve keç ibadetlerde iştirak etmek içün yaşlarnıñ faal celp etilmesini ilân etti. Onıñ aytqanına köre, Aqmescit, Aqyar ve başqa şeerlerde faaliyet köstergen “Toçka oporı” yaşlar areketiniñ azalaı ve göñülliler ibadetlerde daima qoşulalar. Onıñ aytqanına köre, yaşlarnıñ kilse tedbirlerinde iştiragi sözde ayrıca emiyetke maliktir, çünki, onıñ fikrince, “diniy ananelerni” kelecek nesillerge aynı olar yetkizmek kerekler.
Temsilciligimizge, işğalge ve total propagandağa dayanalmayıp Qırımdan ketmege istegen Ukraina vatandaşlarından mektüpler kelmege devam etmekte. İşğal etilgen Qırımdan çıqış hususında talimatnamemiz aqqında hatırlatamız: https://cutt.ly/FwtiajlS
İşğal etilgen Qırımda yaşağan ve yarımadadaki vaziyet, içtimaiy-iqtisadiy vaqialar, rus ordusınıñ yerini deñiştirüvi, qarşılıq areketleri ve başqa adiseler aqqında haber etken añlayışlı Ukraina vatandaşlarına teşekkürlerimizni bildiremiz. Tafsilâtlı malümatnı Temsilcilikniñ matbuat hızmetiniñ e-mail adresine yollañız: [email protected].
Ukrainağa şan-şüret!