Afta içinde olıp keçken esas vaqialar
▶ İşğal etilgen Qırımda defin yerleri yetmey, bazı mezarlıqlarnı kenişletmege planlaştıralar — bazıları endi on fayızğa kenişledi. Bunen beraber rusiye statistikası ölümniñ eksilgenini köstermege tırışa.
▶ Yalta yaqınlarında büyük caermay lekesi ve mazutnen qaplanğan onlarnen ölü quş qayd etildi. İşğalci akimiyet, yoldaş vastasınen alınğan malümatqa baqmadan, bu bulaşuv faktını red ete.
▶ Rusiye bayrağı astındaki ZAİD gemisi işğal etilgen Aqyardaki “Avlita” terminalından Suriyeniñ Tartus limanına 35 800 tonna ukrayin boğdayını çıqardı.
İşğal cinayetleri
▶ Fevralniñ 2-ne qadar işğalciler qanunsız şekilde 224 insannı tutıp aldı, olardan 133 – qırımtatarı.
▶ 2026 senesi fevralniñ 2-ne qadar vaqtınca işğal etilgen Qırımda “rusiye federatsiyasınıñ silâlı quvetlerini itibardan tüşürüv” aqqında rf memuriy cinayetler kodeksiniñ 20.3.3 maddesine köre açılğan 1672 dava qayd etildi. 1542 davada para cezalarınıñ berilmesi ya da davalarnıñ birleştirilmesi aqqında qarar alındı. 17 davanıñ baqılması daa devam ete. Qararlarnıñ 816 (53%) qadınlarğa qarşı ve 724 (47%) erkeklerge qarşı çıqarıldı.
▶ Qırımtatar siyasiy mabüs Seytumer Seytumerovnıñ sağlıq vaziyeti bayağı fenalaştı. Bu aqta mabüsknen körüşüvge barıp kelgen onıñ ömür arqadaşı Pakize Seytümerova haber etti. Onıñ aytqanına köre, Seytumerovnıñ tişleri töküke, közleri bozula, terisi sezilgen derecede solğun, bu da vitaminlerniñ ve küneşniñ eksikliginiñ neticesi ola bile.
▶ 17 yılğa mahküm etilgen ve bir yıldan ziyade ceza izolatorında tutulğan qırımtatar faali Emil Ziyadinov arhangelsk vilâyetindeki 5-nci sanlı ceza koloniyasındaki qattı şartlı müessisege avuştırıldı. Bu aqta onıñ apayı haber etti. Onıñ sözlerine köre, Ziyadinov 2024 senesi küzde etap etilgen soñ, onı bir qaç kereler ceza izolatorına qoydılar, hususan diniy ibadetlerni yapqanı içün, bunı koloniya idaresi rejim bozuluvı olaraq tasnif etmekte.
Zorlavnen seferberlik
▶ Rusiye ordusınıñ Qırımda bulunğan bölüklerinden eñ az 2646 asker öldi. Olar arasında 1410 kişiniñ Ukrayina vatandaşı olğanı tahmin etile.
▶ İşğal etilgen Qırımdan eñ az 125 rf arbiy hadiminiñ esirge alınğanı tasdıqlandı, olarnıñ çoqusı ihtimal Ukrayina vatandaşı.
Qırım yarımadasınıñ askeriyleştirüvi
▶ “Jovta striçka” areketiniñ faalleri işğal etilgen Qırımda yañı qarşılıq aktsiyası keçirdiler. Ukrayina qarşılığınıñ timsalleri birden üç şeerde – Aqmescit, Aqyar ve Aluştada peyda oldı.
İşğalci memuriyetleriniñ propagandası ve duşmanlıqnı qızıştırma
▶ İşğalcilerniñ propaganda matbuat vastaları vaqtınca işğal etilgen Qırımdan Donbassqa studentlerniñ iştiragınen yedinci sözde “gumanitar missiya” başlatılğanı aqqında haber ettiler. Seyaatqa “V.İ.Vernadskiy adına Qırım federal universiteti” ve Aqmescit köllecleriniñ studentleri celp etildi. Olar “gumanitar” faaliyetlerge ve rusiye askerlerine yardım dağıtuvğa celp etilecekler.
Temsilciligimizge, işğalge ve total propagandağa dayanalmayıp Qırımdan ketmege istegen Ukraina vatandaşlarından mektüpler kelmege devam etmekte. İşğal etilgen Qırımdan çıqış hususında talimatnamemiz aqqında hatırlatamız: https://cutt.ly/FwtiajlS
İşğal etilgen Qırımda yaşağan ve yarımadadaki vaziyet, içtimaiy-iqtisadiy vaqialar, rus ordusınıñ yerini deñiştirüvi, qarşılıq areketleri ve başqa adiseler aqqında haber etken añlayışlı Ukrayina vatandaşlarına teşekkürlerimizni bildiremiz. Tafsilâtlı malümatnı Temsilcilikniñ matbuat hızmetiniñ e-mail adresine yollañız: [email protected].
Ukrayinağa şan şerefler olsun!