ESAS MEVZULAR:
▶️ 23 mart künü aqşam saatlerinde Ukraina mudafaa Quvetleri işğal etilgen Aqyarda “Yamal” ve “Azov” büyük desant gemilerine, işğalci bağ merkezine ve rusiye Qara deñiz flotunıñ bir qaç astyapı obyektine muvafaqiyetli darbe kerçekleştirdi.
▶️ 24 mart künü Ukraina mudafaa Quvetleriniñ urucı dronları Aqmescit civarındaki Sarabuz qasabasında işğalcilerniñ arbiy maqsatlarnen qullanğan neft bazasına ücüm etti, ondan soñ ücüm yerinde büyük yanğın meydanğa keldi. Bundan ğayrı, yaqındlardaki uçaq alanında da patlavlar eşitidi, o yerde ihtimal yerleşken arbiy aviatsiya da zarar kördi.
▶️ İşğalciler tarafından qanunsız şekilde mahküm etilgen qırımtatarı Server Zekiryayev tüzetüv cezahanesinde işkencelerge oğratılğanı aqqında aytıp berdi. 2022 senesiniñ sentâbr ayında Novoçerkassk SİZO-sına avuştırılğan mabus, o vaqıttan berli bügünge qadar ceza izolâtorında, qattı tutuluv şartlarında bulunmaqta. Kamerasında daima “Köpek valsı” nağmesi altında tintüvler keçirile, yaqınlarına yazıp, advokatnıñ kelmesini istegen mektüpler ise yiberilmey. Zekiryayevniñ nefes tutulması ve yürek yetersizligi hastalığı ağırlaştı.
İşğal cinayetleri
▶️ Martnıñ 25-ne qadar Qırımda 217 insan qanunsız şekilde mahküm etildi, olar arasında 134 qırımtatarı. Umumiy miqdardan mahküm etilgenler arasında 33 insan tevqif (22 – qırımtatarı), 149 ise apis etildi (olardan 99 qırımtatarı), 26 kişiniñ statusı daa belgilenmedi.
▶️ Martnıñ 25-ne qadar vaqtınca işğal etilgen Qırımda, işğalci “makemelerde” ve başqa “kompetentli organlarda” rusiye federatsiyası Memuriy uquq bozuvları kodeksiniñ 20.3.3 maddesine köre protokol tizilgen 737 vaqia qayd etildi. Olar arasında 641 adisede para cezası şeklinde memuriy ceza berilmesi ya da başqa davağa qoşulıp, umumiy tedbir çıqarılması aqqında qarar berildi. 20 adise alâ daa baqıla. Kesilgen cöremelerniñ umumiy miqdarı eñ az 20,3 mln rus rublersi teşkil etmekte. Umumen 622 kişige memuriy para cezası töletildi. Eñ çoq dava Ermeni Bazarda açıldı. Anda, Qırımda başlatılğan 38 yañı davadan 23-ü anda qayd etildi, soñ 5 ayda (noyabr 2023 – mart 2024) ise Ermeni Bazada umumen 64 “makeme” davası aqqında bildirildi. Şeerdeki suratlı artışlarnı taqip etmege devam etemiz.
▶️ İşgalci “makemede” siyasi mabus Eldar Kantimirovnıñ apis cezasınıñ yañıdan sayılması ve esaplanması içün açılğan dava baqıldı. Dava baqılması red etildi.
▶️ İşğalci makeme advokat Aleksey Ladinniñ Noman Çelebicihan adına batalyonnıñ simvolikasını sözde yayınlağanı içün rusiye federatsiyası Memuriy uquq bozuvları kodeksiniñ 20.3.3 maddesine köre onı qabaatlı dep tanığan qararğa berilgen istinaf şikâyetini baqıp çıqtı. Mudafaa tarafı bir çoq vesiqanıñ incelenmesini ve mütehassıs Çudina-Şmidt ile alternatif hulâsa çıqarğan mütehassısnıñ sorğuğa çağırılmasını talap etti. “Makeme” mütehassıslarnıñ çağırılmasını red etti. Ondan da ğayrı, işğalci “makeme” qırımtatar faalleri Aziz Azizov, Rustem Osmanov ve Mustafa Abduramanovnıñ tevqif etilmesi aqqında qararını da deñiştirmedi. Qırımtatar faali Memet Lümanovnıñ tevqifi aqqında qararğa berilgen istinaf şikâyetini de işğalciler red etti.
▶️ İşğalci makeme sözde “kütleviy haber vastalarınıñ serbestligi suistimalı” aqqında maddege esaslanıp uquqqorçalayıcı ve jurnalist Lütfiye Zudiyevağa qanunsız şekilde 2500 ruble cöreme töletti.
▶️ İşğal etilgen Qırımda işğalci quvetçiler Noman Çelebicihan adına qırımtatar batalyonında iştirak etüv şübesinen bir adamnı tevqif etti. Tevqif etilgenniñ adı ve soyadı daa belli degil, açıq tefsirler de yapılmağan.
▶️ Moskva vilâyetindeki rusiye arbiy istinaf “makemesi” “Qırım musulmanları davasınıñ” figurantları Canköy rayonundan Ekrem Kroş, Ayder Asanov, Lemar Zekeryayev, Osman Abdurazakov ve Refat Seydametovğa sıñırlama tedbiriniñ uzatılmasına berilgen şikâyetni red etti. Advokat dava baqılmasında bozuluvlar olğanını bildirdi.
Qırım yarımadasınıñ askeriyleştirüvi
▶️ “ATEŞ” faalleri Qırımda işğalcilerniñ arbiy tehnikasınıñ areketlerini ve yerleşüvini taqip etmege devam ete. Böyle etip, “ATEŞ” işğal etilgen Canköyge şarq arbiy okrugından, ihtimal novosibirskten işğalcilerniñ ketirilmesini qayd etti. Bundan da ğayrı, faaller Aqmescit civarında Sarabuz qasabasınıñ Ostrâkovo stanstsiyası yaqınlarında işğalcilerniñ bulunma yerini taptı. Stantsiyanıñ yanında işğalciler 11 yük maşnası ve D-20 ya da D-30 tipinde 122 kalibrli gaubitsalar yerleştirgen. Bu, işgalci küçleriniñ, Ukraina Mudafaa quvetlerini arbiyolmağan obyektlerge ücüm etüvde qabaatlama maqsadınen naqliyat obyektleri bulunğan yerlerge arbiy tehnika ve askerlerini yerleştirgenini daa bir kere köstere.
▶️ 19 ve 20 mart künleri rusiye federatsiyasınıñ Qara deñiz flotu suvastı-diversiyalarğa qarşılıq temin etüvden oqutuvlar ötkerdi, o sırada Aqyar şeeriniñ Şimal ve Cenüp iskeleleri bölgesinde atıcılıq silâlarınıñ qullanıluvından meşğuliyetler keçirildi.
Zorlavnen seferberlik
▶️ Rusiye ordusınıñ eñ az 745 askeri defin etildi. Olar arasında 555 kişi ihtimal Ukraina vatandaşı edi. Defin etilgenlerniñ sayısı daa çoq ola bile, çünki definlerniñ çoqusı gizli şekilde yapıla.
▶️ İşğal etilgen Qırımdan eñ az 42 rus arbiy hadiminiñ Ukraina tarafından esirge alınğanı tasdıqlandı, olarnıñ çoqusı ihtimal Ukraina vatandaşı.
İşğalci memuriyetleriniñ propagandası ve duşmanlıqnı qızıştırma
▶️ İşğalciler açıq-açıq Ukrainanı yoq etme niyetlerini bildire: “rusiye Qırımnı ondan almaq içün çeşit-türlü vastalarnı qullanmağa azır olğan devletniñ sıñırlarında mevcüt olmasına yol berip olamaz. “Yañı bölgelerniñ” topraqlarından söz etilmey bile”.
▶️ İşğalciler Katın faciasınıñ vaqialarını hatırlatıp, o vaqialarnı şimdiki vaziyetnen qıyasladı. Olar öz propaganda üslübine köre ukrainlerniñ episini “natsistlerniñ cinaiy areketlerine yardım etüvde” qabaatladılar, özleri ise Buça, Mariupol, Kupyansk ve Ukrainanıñ vaqtınca işğal etilgen topraqlarındaki başka şeer ve qasabalarında yapqan cinayetleri aqqında yalanlarını sürdürmege devam eteler.
İşğalci matbuat vastalarınıñ yayınları
Bu afta Qırımda işğalci memuriyetlerniñ “temsilcileri” tarafından halq ögünde açıq şekilde tarqatılğan rusiyeniñ propaganda añlavtuvları:
▶️ “Qırımtatar Milliy Meclisi öz halqına terör yapqan soñ faaliyetini bitirdi”, – dep haber etti qırımtatar halqı aqqlarınıñ bozuluvı ve Meclisniñ qanunsız şekilde yasaq etilmesini tefsirlegen işğalci memuriyet “temsilcisi”.
▶️ “Qırımda devletleştirilgen mülkniñ satıluvından kelgen paralar içtimaiy programmalarnıñ ömürge keçirilmesi içün masraf etildi”, — işğalciler 2014 senesi Qırım işğalinden soñ mal-mülkniñ qanunsız devletleştirilmesini aqlamaq içün yañı sebepler qıdıra.
İçtimaiy ruh
▶️ İşğalciler Qırımda, askerlik tehnikasınıñ areket etmesine mania olmaq içün demiryol stantsiyasında sözde yanğın çıqaracaq olğan qadınnı qanunsız şekilde tevqif etti. İşğalciler qadınğa qarşı sözde terroristik eylem azırlağanı sebebinden cinaiy “dava” açtı.
▶️ İşğal etilgen Aqyarda keçirilgen qanunsız saylavlar vaqtında bülletenge “Cenk olmasın, Ukrainağa barışıq” dep yazğan 18 yaşında bir oğlannı tuttılar. Yigitke “rusiye ordusını itibardan tüşürüv” maddesine köre ceza kesile bilir.
▶️ Keriçte işğalci quvetçiler qanunsız “vladimir putin saylavlarında” rey bereyatqanda bülleteninde ukrain simvolikasınen resim yapqan, ondan soñra ise bunı işğalcilerden gizlemek içün onı yutqan aqaynı yaqaladılar. İşğalciler yerli sakinni “teşkermege” başladılar.
▶️ Rus işğalcileri Aqyar sakinini sözde “terakt” azırlağanı içün yaqaladılar. İşğalcilerniñ sözlerine köre, yaqalanğan adam martnıñ 11-nde Kozaçya soqağında bir evniñ kirişi yanında gaz borusına patlama aleti qoyğan. İşğalciler patlama dalğasınen sanki bir rus askeriniñ yaşağan evine zarar ketirilmesi planlaştırılğanını iddia etti. İşğalciler aqayğa qarşı cinaiy “dava” açtılar, onı, qanunsız şekilde 20 yılğa qadar apis müddetinen cezalamaq isteyler.
▶️ İşğalciler Aqmescit rayonundaki Badana köyüniñ sakinini tuttı. O, içtimaiy ağlarda “Qırım – Ukraina” yazısını paylaşıp, Ukraina Silâlı quvetlerini beklegenini bildirgen. Adamnı 15 künge tevqif ettiler, onıñ aqqında “materiallar” işğalci memuriyet tarafından işğalci makemege yiberilgen.
▶️ Qırımnıñ sözde “sıñır idaresi” ve sözde “e merkezi” içtimaiy ağlarda putinge ve işğalci rus ordusına qarşı şeyler yazğan, Ukraina Silâlı quvetlerini ve Ukraina topraq bütünligini desteklegen qadınnı tuttı. Al-azırda işğalciler qadınnı qanunsız şekilde 10 künge tevqif etti, oña qarşı üç qanunsız “protokol” tizildi. Ondan da ğayrı, qadınnı kamera ögünde afu soramağa zorladılar.
▶️ İşğalci “makeme” Kefede bir qartiyge “rus ordusını itibardan tüşürüv” sebebinden 30 biñ ruble cöreme töletti. Qadın içtimaiy ağlarında Ukraina Silâlı quvetlerini desteklegen ve işğalci rus rejimini tenqit etken yazılar paylaşqan.
▶️ Üç Aqmescit sakini iştimaiy ağlarda “Çervona kalına” yırını yayınlağanları içün tevqif etildi. Tevqif etilgenlerden birini videoğa çıqarıp, afu soramağa ve rus ordusınıñ arbiy istilâsına qol tutqanını bildirmege mecbur etkenler.
▶️ İşğalci “makeme” sanki Ukraina telükesizlik Hızmetinden vazife alıp, özü yasağan bombanı saqlan yarımada sakinine 7 yıl apis cezası berdi. İşğalciler oña 7 yıl apis cezası ve 300 biñ ruble cöreme belgilegen.
▶️ “Jovta striçka” (“Sarı şerit”) areketiniñ faalleri narazılıq aktsiyalarını keçirmege devam etip, işğal altındaki Qırım şeerlerinde işğalcilerniñ propaganda materiallarını yoq ete ve Ukrainanı desteklegen materiallarnı dağıta. Böyle etip, Ukrainağa qol tutuv plakatları ve sarı şeritler Qırım MC Yuqarı Şurasınıñ yanında ve Aqmescit maallelerinde peyda oldı.
▶️ “Krımski boyovi çaykı” (“Qırımnıñ cenkâver çağalaları”) faalleri işğal etilgen Qırımda qanunsız “saylavlarnı” teşkil etken satqınlarnıñ şahsiy malümatlarını bildirmege devam ete.
▶️ “Zla Mavka” (“Açuvlı Mavka”) qarşılıq areketi işğalciler içün “Qırım – Ukraina” olğanını hatırlatqan kupüra çıqardı. Faaller kündeliklerini alıp barmağa ve işğalcilerniñ cinayetlerini köstergen aftalıq mecmuanı derc etmege devam ete.
Ukrainağa şan-şüret!