Afta içinde olıp keçken esas vaqialar:
▶ Ukrayina pilotsız sistemalar küçleri 92-nci özen qayıq brigadasınıñ yüzüci maşinalarnıñ bazasına, ava meydanını idare etüv, ava nişanlarını patuv ve tanuv içün qullanılğan KASTA-2E2 radar stantsiyasına ücüm ettiler. Olar Gvardiyske cenk aerodromınıñ radar stantsiyasına da ücüm etmege muvaffaq oldılar.
▶ Qırımda yaqın kelecekte yarımada içün ağır ola bilgen sistemalı energiya teminatı meseleleri peyda olacağı beklenile. Rusiyeden uzatılğan sözde “energetik köpür” bölgeniñ ihtiyaclarını tolusınen qarşılamay, elektrik energiyasını çıqaruv quvetiniñ müim bir qısmı eskirgen ve modernizatsiyağa muhtac, bu ise sanktsiyalar ve arbiy faktorlar tarafından mürekkepleşe.
▶ Keriç sakinleri kran suvunıñ pek yaramay olğanına kütleviy sürette şikâyet eteler, olarnıñ aytqanlarına köre, onıñ sarı tüsü ve hoş olmağan qoqusı bar. Yerli sakinlerniñ şikâyetlerine cevap olaraq, işğalci nezareti altında olğan “Voda Krıma” müessisesi meseleni fitoplanktonnıñ miqdarınıñ artmasınen bağladı ve, normalarnı aşqanına baqmadan, suv, iddia etilgenine köre, istimalğa kelişken alda qalğanına işandırdı.
İşğal cinayetleri
▶ Yanvarniñ 5-ne qadar işğalciler qanunsız şekilde 224 insannı tutıp aldı, olardan 133 – qırımtatarı.
▶ 2026 senesi yanvarniñ 5-ne qadar vaqtınca işğal etilgen Qırımda “rusiye federatsiyasınıñ silâlı quvetlerini itibardan tüşürüv” aqqında rf memuriy cinayetler kodeksiniñ 20.3.3 maddesine köre açılğan 1657 dava qayd etildi. 1542 davada para cezalarınıñ berilmesi ya da davalarnıñ birleştirilmesi aqqında qarar alındı. 2 davanıñ baqılması daa devam ete. Qararlarnıñ 816 (53%) qadınlarğa qarşı ve 724 (47%) erkeklerge qarşı çıqarıldı.
▶ 19 yılğa mahküm etilgen vatandaş jurnalist Remzi Bekirov üç aftadan ziyade hakasiya cumhuriyetiniñ abakan şeerindeki 33-nci koloniyasında öz qorantasınen bağlanıp olamay. Bu aqta onıñ ömür arqadaşı Halide Bekirova haber etti. O, qırımtatarnıñ baraklarda tutulğan qattı şaraitlerinen bağlı olaraq, onıñ içün telefon alâqası yasaq olğanını qayd etti, qadın soñki mektüpni dekabrniñ 5-nde alğan, ondan soñ ondan er angi haber yoq.
▶ Sözde “Aqyar şeer prokuraturası” yerli sakinge qarşı cinaiy davanı mahkeme yolladı, o, “terrorcılıq faaliyetine” açıqtan-açıq çağıruvda ve “terrorizmni aqlavda” qabaatlana. Hususan, bu adam, iddia etilgenine köre, açıq Telegram kanallarındaki gruppa çatlarında rusiye federatsiyası topraqlarındaki obyektlerni bombalamav ve ava ile top ücüm etüv aqqında çağıruvlar yerleştirüvde qabaatlana.
Zorlavnen seferberlik
▶ Rusiye ordusınıñ Qırımda bulunğan bölüklerinden eñ az 2563 asker öldi. Olar arasında 1388 kişiniñ Ukrayina vatandaşı olğanı tahmin etile.
▶ İşğal etilgen Qırımdan eñ az 125 rf arbiy hadiminiñ esirge alınğanı tasdıqlandı, olarnıñ çoqusı ihtimal Ukrayina vatandaşı.
Qırım yarımadasınıñ askeriyleştirüvi
▶ “ATEŞ” areketiniñ faalleri Kezlevde Tereşkova yalı kenarında rus askerleri tarafından ateş pozitsiyaları qurulğanı aqqında bildireler.
▶ “Jovta Striçka” areketiniñ faalleri bildirgenlerine köre, işğal etilgen Canköyde rusiye askerleri yerli sakinlerniñ arabalarından benzin hırsızlaylar. İşğalcilerni bir qaç kere tutuldılar, amma olar öz areketlerini “svo ihtiyaclarınen” añlatqan.
İşğalci memuriyetleriniñ propagandası ve duşmanlıqnı qızıştırma
▶ Qırım onkologiya dispanserinde sözde “svo” iştirakçileri içün yardım toplav aktsiyası olıp keçti. “Konstruktiv para toplav” aktsiyası çerçivesinde tibbiyet hadimleri şahsen arbiylernen körüştiler, böyle göñülli teşebbüslerni de, güya, vaqtınca işğal etilgen Qırım sakinleriniñ özleri destekley.
▶ “ATEŞ” areketiniñ faalleri yarımadadaki ruhiy meydannıñ “temizlengeni” ve mahsus hızmetler tarafından idare etilgen RPK-dan ğayrı bütün konfessiyalarnıñ sistemalı sürette yoq etilgeni aqqında haber ettiler. Hususan, Qırımda böyle müessiselerde qanunsız tintüvler ve ana-baba aqlarından marum etüvnen qorqutuv faktlarını, em de diniy insanlarnıñ mecburiy psihiatrik tedaviylevge yollav vaqiaları qayd etildi.
Temsilciligimizge, işğalge ve total propagandağa dayanalmayıp Qırımdan ketmege istegen Ukraina vatandaşlarından mektüpler kelmege devam etmekte. İşğal etilgen Qırımdan çıqış hususında talimatnamemiz aqqında hatırlatamız: https://cutt.ly/FwtiajlS
İşğal etilgen Qırımda yaşağan ve yarımadadaki vaziyet, içtimaiy-iqtisadiy vaqialar, rus ordusınıñ yerini deñiştirüvi, qarşılıq areketleri ve başqa adiseler aqqında haber etken añlayışlı Ukrayina vatandaşlarına teşekkürlerimizni bildiremiz. Tafsilâtlı malümatnı Temsilcilikniñ matbuat hızmetiniñ e-mail adresine yollañız: [email protected].
Ukrayinağa şan şerefler olsun!