ESAS MEVZULAR:
▶️ Sözde “Qırım musulmanları davasınıñ” iştirakçisi qırımtatar siyasiy mabüs Tofik Abdulgaziyev ağır alda çelâbinsk verem hastahanesine avuştırıldı. Advokatı Emil Kurbeninovnıñ sözlerine köre, Abdulgaziyevniñ diagnozı bildirilmey, lâkin pek ağır alda olğanı belli.
▶️ 28 mart künü akşam satlerinde vaqtınca işğal etilgen Aqyar üzerinde ruslarğa ait SU-35 uçağı urıp tüşürildi. Uçaqnı işğalcilerniñ ava mudafaa sistemaları tüşürgeni tüşünile.
İşğal cinayetleri
▶️ Aprelniñ 1-ne qadar Qırımda 217 insan qanunsız şekilde mahküm etildi, olar arasında 134 qırımtatarı. Umumiy miqdardan mahküm etilgenler arasında 33 insan tevqif (22 – qırımtatarı), 149 ise apis etildi (olardan 99 qırımtatarı), 26 kişiniñ statusı daa belgilenmedi.
▶️ Aprelniñ 1-ne qadar vaqtınca işğal etilgen Qırımda, işğalci “makemelerde” ve başqa “kompetentli organlarda” rusiye federatsiyası Memuriy uquq bozuvları kodeksiniñ 20.3.3 maddesine köre protokol tizilgen 737 vaqia qayd etildi. Olar arasında 641 adisede para cezası şeklinde memuriy ceza berilmesi ya da başqa davağa qoşulıp, umumiy tedbir çıqarılması aqqında qarar berildi. 20 adise alâ daa baqıla.
▶️ İşğal etilgen sözde “e merkezi”, 29 fevralde ötkerilgen tintüvlerden aman-aman bir ay keçken soñ “Eski Qırım” mustaqil musulman cemiyetine yasaq etilgen edebiyat saqlavı aqqında memuriy “protokol” tizdi. Rus quvetçileri “Eski Qırım” cemiyeti sözde “kütleviy tarqatuv maqsadınen ekstremist materiallarını saqlağanını” ve böyle materiallarnıñ derc etilmesi ve tarqatılması aqqında “maddeni” bozğanını iddia ete. Protokol cemiyetniñ başı İdris Yurdamovğa qarşı tizildi. Vesiqada o, protokolnen razı olmağanını bildire. Bundan da ğayrı, işğalci “mahkeme” sözde “ekstremizm edebiyatını tarqatma maddesine köre “”Eski Qırım” cemiyetine 100 biñ ruble cöreme belgiledi.
Qırım yarımadasınıñ askeriyleştirüvi
▶️ İşğal etilgen Qırımda rus arbiy tehnikasınıñ avuştırılması qayd etildi. Büyük arbiy arabalar sırası “Tavrida” trassasından Keriç tarafından Ukraina qıtasına doğru areket etkeni körüldi. Arabalarnı köregenlerniñ sözlerine köre, sıra 30-ğa yaqın yük maşnadan ibaret edi.
▶️ “ATEŞ” areketiniñ faalleri vaqtınca işğal etilgen Aqyarda rus işğalcileriniñ yalı mudafaa hattınıñ piyade arbiy arabalarınen quvetleştirilmesine azırlanğanını bildirdiler. Ondan da ğayrı, rus işğalcileri Aqyar üzerinde ava mudafaa sistemalarınıñ arttırılması içün vazifesi bergenleri haber etile. “ATEŞ” areketiniñ faalleri Ukraina Silâlı quvetleriñ Qırımda işğalcilerge qarşı kerçekleştirgen ücümlarından soñ, ruslarnıñ arbiy tehnikasını başqa yerge avuştırğanını bildire. Hususan, rus işğalcileri köçüci artilleriya anbarlarını, şu cümleden “Uragan” çoqlu ateş raketa sisteması içün arbiy yedeklerniñ yerini deñiştirgen. Çünki bu yedekler eñ kiçik ücümlar vaqtında bile qolaylıqnen patlay ve arbiyolmağan yerli ealige telüke köstermektedir. Ondan da ğayrı, “ATEŞ” faalleri işğal etilgen Canköyge ihtimal Uzaq Şarqtan, Komi ve Yakutiya cumhuriyetlerinde işğalcilerniñ kelmesini qayd etti.
▶️ İşğal etilgen Aqmescitte 10 sınıf talebelerine “svo” aqqında ne tüşüngenleri ve rus silâlı quvetlerinde hızmet etmege azır olıp-olmağanları aqqında süallernen anketa dağıttılar. Talebelerden işğalci mudafaa nazirliginen kontrakt imzalamağa istegenleri ve yaqınları ya da tanışları arasında arbiy hızmet yapqanlar olıp-olmağanı aqqında süaller berilgen.
▶️ İşğalciler Aqmescitte talebeler içün arbiy azırlıq merkeziniñ açılğanı aqqında bildire. Merkezde dalıcı ve deñiz azırlığı dersleri teşkil etilecegi planlaştırıla, derslerni işğalci ordu temsilcileri alıp baracaq eken. Dalıcı ve deñiz azırlığından ğayrı, balalar çeşit-türlü arbiy zenaatlarğa ait olğan tasil de alacaqlar, hususan, işğalciler olarğa BPLA qullanuvını öğretmek isteyler.
▶️ 25, 28 ve 29 mart künleri rf Qara deñiz flotı suvastı-diversiyalarğa qarşılıq temin etüvden oqutuvlar ötkerdi, o sırada Aqyar şeeriniñ Şimal ve Cenüp iskeleleri bölgesinde atıcılıq silâlarınıñ qullanıluvından meşğuliyetler keçirildi. Ondan da ğayrı, atıcılıq silâlarını, reaktiv bomba atıcıları ve başqa silâ çeşitlerini qullanuv oqutuvları Körfezlerde ve Ermeni Bazar yaqınlarında keçti.
Zorlavnen seferberlik
▶️ Rusiye ordusınıñ eñ az 745 askeri defin etildi. Olar arasında 555 kişi ihtimal Ukraina vatandaşı edi. Defin etilgenlerniñ sayısı daa çoq ola bile, çünki definlerniñ çoqusı gizli şekilde yapıla.
▶️ İşğal etilgen Qırımdan eñ az 42 rus arbiy hadiminiñ Ukraina tarafından esirge alınğanı tasdıqlandı, olarnıñ çoqusı ihtimal Ukraina vatandaşı.
İşğalci memuriyetleriniñ propagandası ve duşmanlıqnı qızıştırma
▶️ Rus işğalcileri birleşken Batınen cenkleşkenleri aqqında laflarını tarqatmağa tırışa, bu sefer olar NATO-nıñ Yugoslaviyadaki operatsiyasını “Batınıñ birleşip rusiyege qarşı alıp barğan cenki” dep adlandırdı.
▶️ Qırımda işğalci memuriyet temsilcileri rus arbiy cinayetçilerine sözde “Aqyar qanun çıqarıcı meclisi” içün keçirilecek sahte saylavlarda iştirak etüv imkânı berme planlarını bildirdi.
▶️ Rus işğalcileri evelden de yapqanları kibi rus arbiyleri ve olarnıñ qorantalarını Qırımğa yerleştirip yarımadanı öz halqınen toldurmaq istey, böyle etip Saq rayonunda işğalci ordu arbiyleri içün 700 yañı arsa azırlandı.
İşğalci matbuat vastalarınıñ yayınları
Bu afta Qırımda işğalci memuriyetlerniñ “temsilcileri” tarafından halq ögünde açıq şekilde tarqatılğan rusiyeniñ propaganda añlavtuvları:
▶️ İşğalci memuriyet temsilcisi yaqında moskvada olğan terror ücümi içün mesüliyetni İslam Devleti özüne alğan olsa da, ukrainlerni qabaatlay – “kıyiv rejiminiñ terrorizm maiyeti kimsede şübe yaratmay, terror dalğasını toqtatmaq içün vastalardan biri – qayda olsalar da ve kim olsalar da episiniñ birden yoq etilmesidir”.
▶️ İşğalciler nevbetteki kere ukrain halqını canavarlıqları ve yañı büyük ücüm etüvlernen qorqutmağa devam ete. Böyle etip olar yaqında rusiyede olıp keçken arbiy areketlerde Ukrainanıñ alâqadarlığı aqqında yalanlarını quvetleştirmege isteyler – “ukrainlerniñ qarşılığı belli. Olar quvançından aman-aman uluylar. Olarnı yoq etmek kerek, alâqası olğan, insanlarımıznıñ ölmesinden qılınğav ve quvanğan er kesni”.
İçtimaiy ruh
▶️ Aqmeçitte işğalciler 13 yaşındaki oğlannı tuttı. Oğlan, işğalci ordunıñ ve PVO sistemalarınıñ yerini çekip, sanki “ATEŞ” faallerine yibergen. Onı kamera ögünde afu soratqanlar, soñra ise “profilaktik” qonuşuv yapqanlar.
▶️ İşğal etilgen Aqmescitte quvetçiler “putin saylavları” vaqtında “Ukrainağa şan-şüret” dep bağırğan yerli sakinni tevqif ettiler. Erkek adamğa qarşı sözde “ekstremizm proragandası” içün “cinaiy dava” açacaq olalar. Daa evel de bu adam sözde “rus ordusını itibardan tüşürüv” içün qanunsız olaraq tevqif etilgen eken.
▶️ İşğal etilgen Sudaqta yaşağan bir qadınnı içtimaiy ağlarda rus işğalcilerini yamanlap yazğanı içün tevqif etkenler. Qadınnı sözde “ekstremizm propagandasında” qabaatlap, 5 yıl apis cezası bermek isteyler.
▶️ Eki Bağçasaray sakini işğal etilgen Qırımda mecburiy seferberlikni yamanlağanları içün işğalciler tatarfından tevqif etildi ve cöreme tölediler. Aqaylarnı “rus orudını itabrdan tüşürüvde” qabaatlaylar. Olarnı kamera ögünde afu soramağa zorlağanlar, soñra ise qanusız şekilde ordu celpnamesi tutturğanlar.
▶️ “Jovta striçka” (“Sarı şerit”) areketiniñ faalleri narazılıq aktsiyalarını keçirmege devam etip, işğal altındaki Qırım şeerlerinde işğalcilerniñ propaganda materiallarını yoq ete ve Ukrainanı desteklegen materiallarnı dağıta. Böyle etip, Ukrainağa qol tutuv plakatları ve sarı şeritler Aqyar, Aqmescit, Yalta, Kezlev ve başqa işğal etilgen şeerlerde peyda oldı.
▶️ “Krımski boyovi çaykı” (“Qırımnıñ cenkâver çağalaları”) faalleri işğal etilgen Qırımda satqınlarnıñ ve işğalcilerniñ şahsiy malümatlarını bildirmege devam ete.
▶️ “Zla Mavka” (“Açuvlı Mavka”) qarşılıq areketi kündeliklerini alıp barmağa ve işğalcilerniñ cinayetlerini köstergen aftalıq mecmuanı derc etmege devam ete.
Ukrainağa şan-şüret!