2018 senesi boş ay (noyabr) 26 künü Parijdeki Arbitraj tribunalı Rusiye Federatsiya tarafından Qırımnıñ ilhaq etilüvi neticesinde zarar körgen Oşçadbanknıñ taziminat talabını qanaatlendirdi. Tazminat miqdarı 1,3 milliard AQŞ dollarnı teşkil etecek, buña qararnıñ çıqarıluvından taziminatnıñ tölenmesine qadar toplanğan faizlar da qoşulacaq. Birleşken Milletler Teşkilâtı halqara ticaret uquqı boyunca Komissiyası Arbitraj reglamentiniñ 32 maddesine binaen, arbitraj qararı qatiy ve vaciptir. Taraflar arbitraj qararını keçikmeden yerine ketirmeliler.

Arbitraj qararını alğan soñ, Oşçadbank qararnı yerine ketirmek ve Rusiye Federatsiyasından tazminatnı almaq içün bütün kerekli tedbirlerni yapacaq. ‘‘Oşçadbank’’ Aktsioner Cemiyetiniñ idare reisi Andriy Pışnıy aytqanına köre, bank mütenasip saada bütün dünyada Rusiyeniñ mülkü boyunca Arbitraj qararınıñ yerine ketirilüvini faal şekilde talap etecektir.

Aktsiyalarınıñ 100% devletke ait olğan ilk şirket Oşçadbank aynı vaqıtta Qırım ilhaqı neticesinde körgen zararı boyunca Rusiye Federatsiyağa qarşı davada ğalebe qazanğan birinci banktır.

‘‘Misalimiz, topraqlarımıznıñ bir parçasını işğal etken ve böyleliknen devletimizge zarar ketirgen istilâcını adliy saada cevap berdirtmege mümkün olğanını numayış ete. Em devlet, em de şahsiy mülkiyetinde olğan başqa ukrain şirketlerni halqara arbitrajğa muracaat etip, adaletni tiklemek ve işğalcınıñ devletimizge ücümi neticesinde ketirgen zararlardan eñ azından Ukrainanıñ iqtisadiy ğayıpları içün mesüliyetke çekmege çağıramız’’, – dep qayd etti Andriy Pışnıy.