2018 senesi boş ay (noyabr) 15 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikteki halqara alâqalar hızmetiniñ hadimleri Yevgen Samuha ile Valeriya Pahomova Ukraina Yuqarı Şurası çetel işler Komitetiniñ oturışında iştirak ettiler.

Toplaşuv esnasında Daimiy Temsilci ‘‘Qırımnı işğalden azat etüvniñ dostları’’ halqara platformasınıñ faaliyetini faalleştirüv, işbu platforma çerçivesinde halqara cemiyet vekilleriniñ iştiragi ile bir sıra tedbirlerni keçirüv boyunca öz tekliflerini taqdım etti. Borıs Babin Temsilcilikniñ bu yönelişteki faaliyeti aqqında ikâye etti. Qırımnı işğalden azat etüvniñ dostları’’ halqara platforma çerçivesinde 2018 senesi devamında keçirilgen tedbirler de muzakere etildi.

Oturışnıñ neticesi olaraq, Temsilcilikniñ ve Ukraina çetel işler Nazirliginiñ tekliflerini diqqatqa alaraq, Komitet ‘‘Qırımnı işğalden azat etüvniñ dostları’’ halqara platforma çerçivesinde faaliyeti devam etmege qarar aldı.