Avropa Şurasınıñ Parlament assambleyası oktâbrniñ 1-nde Strasburgda keçirilgen sessiyasında “Journalists matter: the need to step up efforts to liberate Ukrainian journalists held in captivity by the Russian Federation” (Jurnalistler müim: Rusiye Federatsiyası esirliginde tutulğan ukrain jurnalistlerini azat etmek içün ğayretlerniñ arttırılması kerekligi aqqında) qararını qabul etti.

Rezolütsiyanıñ temelinde, Kütleviy haber institutı tarafından yayınlanğan siyasiy mabüs olğan 26 jurnalistniñ cedveli yer almaqta. Olarnıñ arasında qırımlılar da bar: Oleksiy Bessarabov, Dmıtro Ştıblikov, Ernes Ametov, Marlen Asanov, Timur İbragimov, Seyran Saliyev, Server Mustafayev, Rustem Şeyhaliyev, Ruslan Suleymanov, Osman Arifmemetov, Remzi Bekirov, Amet Suleymanov, Asan Ahtemov, İrina Daniloviç, Vilen Temeryanov, Aziz Azizov, Rustem Osmanov.

Avropa Şurasınıñ Parlament assambleyası Rezolütsiyasında “vatandaş jurnalistikası” termini ilk sefer qullanıla. Hususan, Qırımdaki vatandaş jurnalistleri er kün işğalni aydınlatmaq içün telükege oğrağanları qayd etile. Olarnıñ çoqusı zenaat jurnalistleri degil de, qırımtatar faalleri ve siyasiy mabüslerniñ tuvğanları ola, olarnıñ çoqusı öz telükesizligi içün gizli çalışmağa mecbur. Çoqusı allarda taqipniñ qurbanı olar olalar.

Rezolütsiya Avropa Şurasınıñ aza devletlerine böyle çağıruvlarda buluna:

• Halqara mesüliyet mehanizmlerini qorçalamaq: Ziyan sicili, Arizalarnı baquv komissiyası, Tecavuz cinayeti içün mahsus mahkemeniñ meydanğa ketirmek; Ukrayina v. Rusiye devletler ara davalarda İnsan aqları Avropa mahkemesi qararlarınıñ yerine ketirilmesi;
• Ukrayin jurnalistlerine qol tutuv: maliyeviy yardım, mentorlıq programmaları, Avropa muarririyetlerine ketmege mecbur olğanlarnıñ integratsiyası içün programmalar kirsetmek;
• Rusiye ükümet azalarını mesüliyetke çekmek içün Halqara cinaiy mahkemeniñ imkânlarını ve universal yurisdiktsiya printsipini qullanmaq;
• Milliy aq qorçalayıcı institutlarnıñ işini desteklemek;
• Jurnalistlerge qarşı cinayetlerde iştirak etken er keske qarşı sanktsiyalarnı quvetleştirmek.

Aynı zamanda Rezolütsiya Avropa Şurasınıñ Parlament assambleyasında er yıl ”Victory for Victoria” adlı hatıra merasimini başlata. Bu, küz sessiyasında ayrı bir kün olacaq, anda iştirakçiler öz zenaat vazifelerini eda etkende, ayatını telükege oğratqan arbiy mühbirlerni añacaqlar. Tedbir adı ukrayin jurnalisti Viktoriya Rosçinanıñ şerefine qoyuldı, o, rus arbiyleri tarafından zapt etilip, işkenelerge oğratılfı ve esirlikte elâk oldı.

Qararğa rey berüvden soñ, ”PRESS IN DETENTION” sergisi açıldı, onda Rusiye esirligine oğrağan jurnalistlerniñ portretleri numayış etile.

Yevgeniya Kravçuk ve Avropa Şurasınıñ Parlament assambleyasındaki bütün ukrain eyetine Qırım boyunca faaliyeti ve Rusiyeniñ mesüliyetke çekilmesi içün müim sistemli işleri içün minnetdarmız. Rezolütsiyanıñ metinini mında oquñız:
https://pace.coe.int/en/files/34532/html