2019 senesi saban (mart) ayı 20 künü Brüsselde Ukraina Prezidenti Petro Poroşenkonıñ, Avropa Şurasınıñ Prezidenti Donald Tusknıñ, Avropa Komissiyasınıñ Prezidenti Jan-Klod Yunkerniñ, Avropa Parlamentiniñ Prezidenti Antonio Tayaniniñ ve Avropa Komissiyasınıñ esas azalarınıñ iştiragi ile Ukraina – Avropa Birligi mini-sammiti olıp keçti.

Tedbirniñ esas maqsadı – eñ yaqın kelecekte Ukraina ile AB munasebetleriniñ inkişafına yanaşuvlarnı uyğunlaştıruv ve mevcut cağıruvlarğa beraberlikte qarşılıq kösterüvdir.

Qırımnı Rusiye tarafından qanunsız alda ilhaq etme teşebbüsiniñ 5-yıllığı munasebeti ile devletimizniñ Başlığı Qırımnı diplomatik-siyasiy vastalarnen işğalden azat etüv ve onı ukrain egemenligi altına qaytaruv siyasetine sadıq qalğanını tasdıqladı.

Ukraina Prezidenti Qırımnı qanunsız alda ilhaq etilmesini tanımağanı ve halqara uquqnı qaba şekilde bozğanı içün Rusiyege qarşı sanktsion tertibini devam etken Avropa Birligine açıq-aydın mevamı içün öz minnetdarlığını bildirdi.

Cemi ukrain deñizcileri ile diger reinelerni qurtarmaq ve Ukraina topraqlarını tamamınen Rusiye istilâsından azat etmek maqsadınen Petro Poroşenko Avropa Birligini Rusiyege sanktsion basqını devam etmege çağırdı.

Devletimizniñ Başlığı Rusiye Azaq deñizini ve Keriç boğazını yavaş-yavaş işğal etkeni ve gemicilik serbestligini bozğanı içün Avropa Birligi qabul etken ”Azaq paketı” sanktsiyaları boyunca qararnı alğışladı ve ukrain deñizcileriniñ deral azat etilmesi içün Rusiye Federatsiyasına basqını arttırmağa çağırdı.

Mini-sammit iştirakçileri ukrain Azaq boyuna içtimaiy-iqtisadiy yardım leyhasınıñ başlanmasını tezleştirmege añlaştılar.

https://www.president.gov.ua/news/prezident-vzyav-uchast-u-mini-samiti-ukrayina-yes-54106