Aprelniñ 28-nde Poloniya tarafı vaqtınca işğal etilgen Qırımda qanunsız arheologik işlernen oğraşqan Rusiye arheologı Aleksandr Butâginni azat etti. O, Poloniya ve Beyazrusiye arasında “beşine beş” formulası boyunca deñişimniñ bir qısmı olaraq teslim etildi.

”Ukrayina, işğal ve cenk ğayretinde iştirak etken bütün rusiye teşkilâtlarını kerçek qanuniy esapqa çekmege devam ete. Butâgin davası ve buna oşağan diger vaziyetlernen bağlı olaraq, Ukrayina kerekli uquqiy mehanizmlerni qullanmağa devam etecek ve ortaqlarımıznıñ yurisdiktsiyaları çerçivesinde çalışacaq”, – Georgiy Tıhıy, Ukrayina Tışqı işler nazirliginiñ matbuat kâtibi.

Hatırlatmaq kerek ki, Aleksandr Butâgin Keriç civarındaki qadimiy Mirmekiy meskeninde qazma işlerini idare etti. Onıñ yolbaşçılığında gruppa Qırımnıñ medeniy mirasını sistematik şekilde yoq etti, hususan Keriçte “Mirmekiy qadimiy şeeri” tarihiy yeriniñ medeniy qatlamını aman-aman eki metr terenlikke qadar alıp taşladı. Bu ve diger areketleri neticesinde Ukrayinağa ketirilgen zarar 200 million grivnadan ziyade oldı.

2025 senesi soñunda Poloniya Ukrayinanıñ ricasınen Butâginni tuttı. Ukrayina onı ekstraditsiya etmekni talap etti, Poloniya prokuraturası ve mahkemesi buña razı oldılar.