Qırımtatar siyasiy mabüs Tofik Abdulğaziyevniñ ömür arqadaşı Aliye Kurtametova aqayınıñ yaşayışını telükege altına qoyğan verem hastalığınıñ dörtünci stadiyada olğanını haber etti. Rusiyeniñ “qanunlarına” köre, böyle hastalığı olğan mabüsniñ apishaneden çıqarılması mümkün. Lâkin Aliye ruslarnıñ aqayını azat etmege red etkenlerini bildirdi:

Aqcigerlerinde er yerde qara lekeler bar. O, zor alda. Lâkin apishane ekimleri böyle hastalarnı tek “ölümge eki saat qalğanda” azat eteler, deyler.

Aliye Kurtumerova, apishanedeki yaramay aşlar aqayınıñ alını daa çoq fenalaştıra, çünki verem hastalığı olğan insanlarnıñ pek yahşı aşaması kerekligini qoştı. Bundan da ğayrı, aqayı bulunğan çelâbinsk şeerindeki 3-nci apishaneniñ verem hastahanesi ailesi yollağan aşaytlarnı qabul etmey.

Tofik Abdulgaziyev işğalciler tarafından “ekinci Aqmescit gruppası” davası boyunca qanunsız şekilde mahküm etilgen edi. Onı 2019 senesi tevqif etken ediler. 2022 senesi mayıs ayında işğalci “mahkeme” Abdulgaziyevni, qanunsız olaraq 12 yılğa mahküm etti. 2023 senesi iyül ayında mabüs rusiyeniñ çelâbinsk vilâyetindeki apishanege etap etildi.

Tünevin, iyülniñ 8-de, çelâbinsk şeeriniñ Metallurgiya rayon mahkemesi Tofik Abdulgaziyevniñ advokatı tarafından berilgen mabüsniñ sağlıq vaziyeti sebebinden apishaneden azat etilmesi aqqında muracaatını baqacaq edi. Lâkin oturuşuv avgust ayına avuştırıldı.