Miyinde yaman tabiatlı şişik diagnozı qoyulğan qırımtatar siyasiy mabüsi Tofik Abdulğaziyevniñ alı fenalaşmaqta. Yaqında ömür arqadaşı Aliye Kurtametovanen olğan qonuşuvlarnıñ birinde qırımtatarı oña qol tutqanlarnıñ episine mektüp yiberdi.

“Assalâmu aleyküm ve rahmetullahi ve barakatuh, menim eñ aziz cemaatım.
Sizge Allahnıñ qulu Tofik yaza.

Közlerim daa bütünley kör olmağance ve men daa ayınıq şekilde tüşünip olğance, sizge bu mektüpni yazmağa qarar berdim.

Meni unutmayıp, maña daa bir imtian bergeni içün, Allahqa şükürler olsun. Men er şey içün Allahqa soñsuz şükür etem ve buña samimiy quvanam.

Bazıları mana deli deydir: «Mında quvanacaq ne bar? O, apishanede otura, bir sıra hastalıqları bar ve ilâhre».

Evel, men serbest olğanda, er şeyni añlağanımnı tüşüne edim. Ebet, namaz qıldım. Ebet, oraza tuttım. Ebet, yahşı işler yaptım. Amma apishanege tüşkende Rabbime daa yaqın oldım, Onı o qadar sevdim ki, bu duyğularnı sözlernen ifade etip olamayım. Er an, Allah maña nasıl yardım etkenini ve doğru yolnı köstergenini is etem.

Bu dünya kimerde insannı o qadar süyrekley ki, yazıq ki, biz çoq şeyni unutamız. Biz daima qaydadır çapıp, aşıqamız, aşıqıp namaz qılamız, Rabbimizge keregi kibi vaqıt ayırıp olamaymız, ebediy yaşaycaq kibi davranamız. Men şimdi şahsen özüm aqqında aytam. Amma, mında olıp, añlaysıñ ki, Allahtan başqa, seniñ iç kimseñ yoq.

Yaqında maña miyde yaman tabiatlı şişik diagnozı qoyuldı. Terenden tüşünmegen insan içün bu – bir üküm kibi kele, musulman içün ise bu nevbetteki bir imtiandır. Men bunı yahşı bilem ve bir an bile peşman degilim. Epimiz Allahqa aitmiz ve Oña qaytacaqmız. Menim içün eñ esası – Rabbime nasıl kelecegim ve Onıñ bağışlavını qazandımmı, yoqmı?

Bu mektüpte, aziz cemaatım, sizge şunı aytmaq isteyim: qorqmañız ve kederlenmeñiz. Resulüllah ‘aleyhissalâm İbn Abbasqa böyle dedi:

“Ey, oğlan, men saña bir qaç söz ögretecegim. Allahnı hatırla, O seni qorçalar. Allahnı hatırla, Onı ögüñde taparsıñ. Eger bir şey isteseñ, Allahtan sora. Eger yardım isteseñ, Allahtan iste. Ve bil ki, eger bütün halq saña fayda ketirmek içün toplansa, Olar sizge ancaq Allah yazğanlarından fayda ketirip olurlar. Eger olar sizge zarar bermek içün birleşseler, ancaq Allahnıñ sizge yazğanından zarar ketire bilirler. Çünki qalem ucu endi köterildi, saifeler qurudı».

Onıñ içün tek areketlerimiz bizge bağlıdır. Ölüm de öyle. Epimiz pek yahşı bilemiz ki, insanlar öleler, amma er kes – öz vaqıtında ve kününde. Onıñ içün «kederlenmeñiz»)).

Esas olğan – taşları qaviy olğan bir bina kibi oluñız, Allahnı daa evel iç sevmegeniñiz kibi seviñiz.

Men lâqayd olmağan er bir adamğa öz minnetdarlığımnı bildirmege isteyim: menim içün daima dua oquğanlarğa, qorantama yardımcı olğanlarğa. Allah sizden razı olsun, epiñiz içün daima Allahıma dua etem.

Ebet, bizim yolumız qıyın, amma soñu eñ hayırlı olur, inşaAllah.

Bizim advokatlarımız – siz eñ yahşısıñız! Allah sizden razı olsun.

Ağa-qardaşlarım! Er şeyge baqmadan, öz qıymetli vaqıtlarını sarf etken, qorantalarımızğa yardım eteler. Allah sizden razı olsun ve sizge biñ qat qarşılığını bersin.

Aziz insanım, anam! Bizim içün yapqan er bir işiñizden Allah senden razı olsun.

Bu dünyada eñ yahşı qardaşım, Lilâ! Allah senden ve qorantañdan razı olsun. Sen er vaqıt bu qaranlıq divarlarda meni teselli etmek, künümni yahşılaştırmaq içün kerekli sözler tapasıñ.

Bu ömürde yol arqadaşım, sadıq dostum ve sırdaşım, maña Allahtan bahşış olaraq berilgen apayım! Men senden apay olaraq da, dost olaraq da razım. Ne olsa olsun, er vaqıt yanımdasıñ. Allah senden razı olsun.

Aziz Cemaatım! Allahnıñ yipinden qattı tutunıñız ve bölünmeñiz! Kerçekten de, Allahnıñ yardımı yaqındır!”

Tofik Abdulğaziyev 2019 senesi mart ayında Aqmescitte qırımtatar evlerinde eñ büyük tintüvlerden soñ tutıp alındı. O, onlarnen başqa faaller kibi, terror teşkilâtlarına qoşulğanında qabaatlandı. 2022 senesi mayıs ayında rostov-na-donu şeerindeki cenübiy rayon arbiy mahkemesi Abdulğaziyevni 12 yılğa maksimal havfsızlıq koloniyasına mahküm etti, 2023 senesi iyül ayında ise onı çelâbinsk vilâyetindeki yuqarı ural apishanesine avuştırdılar.

2024 senesi mart ayından başlap Tofik Abdulğaziyev çelâbinsk şeerindeki 3-nci sanlı apishane verem hastahanesinde buluna. Oña kökrek içindeki limfa tüyümleri zararlanğan disseminirovannıy aqciger verem diagnozı qoyuldı. Aprel ayında erkekni reanimatsiyağa avuştırdılar, anda verem ve bir sıra yanındaki ağır hastalıqlar tasdıqlandı: eki taraflı pnevmoniya, qansızlıq, yürek hastalığı, gastrit, büyrek taşları. Onıñ ağır vaziyetine baqmadan, 2024 senesi avgust ayında mahkeme Abdulğaziyevniñ müddetten evel azat etilmesini qısmen red etti.

Bu seneniñ oktâbr ayında qırımtatarnıñ közleri keskin bozulğanı belli oldı – noyabr ayında o, körüv qabiliyetini qısmen coydı. Küzde Tofik Abdulğaziyevniñ yaman tabiatlı miy şişigi olğanı ve oña ameliyat kerek olğanı belli oldı. Qarısı ekimlerniñ oña kerekli tibbiy yardımnı kösteralmağanını qayd ete.