Tünevin “UMMA” Ukraina musulmanları diniy idaresi Ukraina musulmanları Kongressinen birlikte Ramazan ayı vesilesinen resmiy iftar akşamı keçirdi. Tedbirge İslâmnı kütken ukrain arbiyleri, musulman din adamları, diplomatik qurulışlar temsilciler, siyasiy ve cemaat erbapları qoşuldı.

Resmiy iftar vaqtında “UMMA” Ukraina musulmanları diniy idaresi Ukrainada İslâm dininiñ inkişafı ve musulman cemiyeti içün yapılğan yararlıqlar içün mükâfatlar taqdim etti.

Tedbir vaqtında Ukraina Prezidentiniñ Qırım Muhtar Cumhuriyetindeki Daimiy Temsilcisi Tamila Taşeva “İslâm ve Ukrainağa hızmet etüv içün” mukâfat aldı. “UMMA” Ukraina musulmanları diniy idaresiniñ “İslâmğa hızmet etüv içün” medalini farqlı dinlerni kütken Ukraina vatandaşlarına taqdim etile. Bu mukâfat İslâm dininiñ, Ukrainada musulman müitiniñ inkişafı; musulmanlarnıñ menfaatlarına qol tutuv; olarnıñ aq-uquqlarını qorçalav; Ukraina musulmanları cemiyetiniñ inkişafı saasında şahsiy qazançlar; musulman diniy toplulıqlarına yardım; Ukraina musulman cemiyeti temsilcilerinen bağlı olğan ilmiy, içtimaiy, siyasiy, medeniy faaliyetlerde iştirak etüv ve “UMMA” Ukraina musulmanları diniy idaresinen çoq yıllıq işbirlik esasında berile.

Daimiy Temsilciden ğayrı, bu mukâfat 635-nci ayrı uçaqquvar-qurşunatqıç batalyonnıñ 1-nci rota idaresiniñ komandanına da berildi.

“UMMA” Ukraina musulmanları diniy idaresiniñ eñ yüksek mukâfatı olğan “Al-Fida” nişanları Şeyh Mahsur göñülliler batalyonunıñ komandanı Muslim Çeberloyevskiyge, 635-nci ayrı uçaqquvar-qurşunatqıç batalyonnıñ 1-nci rota baş idaresiniñ komandanı Said İsmagilovğa ve paramedik “Kroha” lağabınen Olga Başeyge taqdim etildi.