Bugün Temsilcilikte Avropa Şurasınıñ İnsan aqları komissarı Maykl O’Flaerti ile körüşüv keçti. O’Flaerti Dunâ Miyatoviçniñ vazife müddeti bitken soñ bu vazifege tayin etildi. Ukrainağa ziyaret O’Flaertiniñ yañı vazifege tayin etilgeninden soñ ilk ziyaretlerinden biri.
Temsilcilikten körüşüvde Daimiy Temsilci Tamila Taşeva ve Qırım Platforması faaliyetini temin etüv hızmetiniñ yolbaşçısı Mariya Tomak iştirak etti.
Ukrainadaki vaziyet bütün Avropada insan aqları içün pek müim. Şimdi olğanlar, tek Ukrainen alâqalı degil, epimiznen alâqalı, çünki başqa Avropa memleketleri nevbette olar ola bilecegini is ete.
— dep qayd etti Avropa Şurasınıñ insan aqları komissarı körüşüvniñ başında.
Tamila Taşeva Kommisarğa Temsilcilikniñ çalışuv yönelişleri, hususan, reintegratsiya siyasetiniñ işlep çıqarılması saasında faaliyetleri, bu faaliyetlerniñ esas yanaşuvları aqqında aytıp berdi.
Körüşüv vaqtında insan aqları komissarı, bu vazifede esas maqsatlarından biri Ukraina halqını, hususan işğal etilgen Qırımda yaşağan vatandaşlarnı qoruv olacağını bildirdi.
Körüşüv vaqtında taraflar işğal etilgen yarımadada insan aqları vaziyetini müzake etti. Daimiy Temsilci işğalcilerniñ Qırımda Ukraina vatandaşlarını taqip etmege devaö etkenlerini qayd etti. Taşeva su sene Ukraina qırımtatar halqı sürgüniniñ 80-ncı yıllığını qayd etecegini hatırlattı. Ayrıca, Temsilci O’Flaertige müracaat etip, qırımtatar halqı sürgünligini Avropa Şurası memleketleri seviyesinde genotsid olaraq tanımağa çağırdı.
Daimiy Temsilci siyasiy mabüslerni desteklevden mentorlıq programması aqqında hatırlattı. Siyasiy mabüslerge çeşit liderler tarafından qol tutulmasını kösde tutqan bu programmağa Temsilci, Kommisarnı da mentor olaraq qoşulmağa davet etti.
Hatırlatamız, yaqında Temsilcilikniñ davetine Almaniya Bundestagınıñ vitse-prezidenti Katrin Gering-Ekard ve Ukrainada Avropa Birliginiñ elçisi Katerına Meternova da qoşuldı. Maykl O’Flaerti bu teklifni baqıp çıqacağına söz berip, onıñ içün ayrı insan yaşayışları eñ üst yerde olğanını qayd etti.
Körüşüvniñ soñunda Daimiy Temsilci Ukrainağa destek içün teşekkürlerini bildirip, Ukrainada, hususan işğal etilgen topraqlarda insan aqları vaziyetiniñ tüzeltilmesi içün ortaq çalışmalar yapılacağına ümüt beslegenini ifadeledi.