Sentâbrniñ 30-nda Daimiy Temsilci Olga Kurışko Büyük Britaniya qıraliyet ailesinden printsessa Annanıñ ziyareti münasebeti ile Ukrayinadaki Büyük Britaniya elçihanesinde keçirilgen tantanalı merasimde iştirak etti.

Olga Kurışko onıñ Azretlerine “Taşqırğan. Qırımda qadınlarnıñ qarşılığı” adlı katalognı ediye etti. Bu katalogta, daa 2014 senesinden berli işğal altında olğan Qırımda rus tecavuzı ve işğalinen qarşılaşqan qadınlarnıñ tecribeleri aqqında ikaye ete. Bundan da ğayrı, 2024 senesi Temsilcilikte qadınlarnıñ cenk şaraitlerinde yaşayış tecribesi aqqında tarif etken aynı adlı sergi ötkerilgen edi. “Taşqırğan” sergisinde esas diqqat, işğal şaraitlerinde öz aqları ve serbestligi içün açıq küreşke çıqqan, Rusiye rejiminiñ siyasiy mabüsleri olğan qadınlarnıñ ikâyelerine bağışlanğan edi.

Körüşüv vaqtında Daimiy Temsilci, Azretlerine, vaqtınca işğal etilgen yarımadada vaziyet ve Temsilcilikniñ faaliyeti aqqında aytıp berdi. Onıñ qayd etkenine köre, teşkilâtnıñ faaliyeti Qırımdaki vaziyet aqqında malümat toplanuv ve talil etüv, akimiyet organları ve halqara ortaqlar içün tevsiyeler azırlav, işğalden zarar körgen vatandaşlarğa qol tutuv, em de Qırım meselesini dünya kün tertibinde saqlamaq içün vatandaş cemiyeti ve uquq qoruyıcı teşkilâtlarnen beraberlikte leyhalarnı amelge keçirüvge esaslanğanını bildirdi.

Körüşüv, Büyük Britaniyanıñ Ukrayinağa, onıñ suverenitetine ve topraq bütünligine qol tutqanınıñ daa bir isbatı oldı.