Daimiy Temsilci Olga Kurışko Kıyivde olıp keçken Halqara Qırım platformasınıñ ekspertler ağınıñ dörtünci halqara forumında açılış sözünen çıqışta bulundı. Forumda Ukraina Tış işler nazirligi, Ukraina Mudafaa nazirligi, Ukraina iqtisat nazirligi, Milliy havfsızlıq ve mudafaa şurasınıñ vekilleri, mustaqil ekspertler, halqara analitik merkezleriniñ temsilcileri, ükümetke ait olmağan teşkilâtlarnıñ vekilleri, insan aqları faalleri ve diplomatlar iştirak eteler.

Olga Kurışko öz çıqışında Qırım platforması ve onıñ üç esas ölçüsi: ükümet, parlament ve ekspert ölçüsi aqqında söz yürsetti. Teşebbüs Qırım mevzusına ve er kün ukrainlerniñ qarşılaşqan sınavlarğa halqara cemiyetniñ diqqatını celp etmege baqtırılğan. Olga hanım ayrıca, Temsilcilik rusiye federatsiyasınıñ propagandasına qarşı turmaq maqsadınen daima brifingler keçirgenini ve dünya toplulığını vaqtınca işğal etilgen Qırımdaki vaziyet aqqında haberdar etkenini qoştı.

“Biz rusiye federatsiyasınıñ propagandasına, hususan, tam miqyaslı ücümden soñ, vaqtınca işğal etilgen topraqlarğa ve hususan Qırımğa ait faal sürette darqalğan teşviqatına qarşı çıqmaq içün çalışamız“, — dep qayd etti Olga Kurışko.

Daimiy Temsilci işğal etilgen Qırımdaki şimdiki vaziyetke diqqat celp etmek içün Ukraina studiyalarınıñ global ittifaqı tarafından halqara institutlarnen yapılacaq añlaşmalarnıñ azırlanması aqqında haber etti. Olga Kurışko Halqara Qırım platformasınıñ beşinci sammitine ve Dörtünci parlament sammitine azırlıqlar aqqında da aytıp berdi. O, “Crimea Global“ üçünci halqara konferentsiyasını teşkil etilmesi üzerindeki çalışmalar aqqında da malümat berdi, konferentsiyanıñ maqsadı Ukrainanıñ Asiya, Afrika, Cenübiy ve Orta Amerika memleketlerinen özara tesirini pekitmege yardım etmek, em de Qırım aqqında rus miflerini yoq etmek.

Olga Kurışko Rusiye tarafından qanunsız şekilde esirlikte tutulğan siyasiy mabüsler meselesini de ayrıca qayd etti: 2025 senesi avgust ayında berilgen malümatqa köre, 222 Qırım sakini rus esirliginde tutulmaqta, olar arasında 133 kişi – qırımtatarlar. Daimiy Temsilci olarnıñ sebatını qayd etip, Kreml mabüsleri aqqında malümatnı arttırmaq maqsadınen ömürge keçirilgen siyasiy mabusler içün advokatura mentorlığı programmasına diqqat celp etti. Olga Kurışko şimdiki vaqıtta rusiye esirliginde bulunğan yeñilmez qadınlarnıñ ikâyelerine de ayrıca diqqat ayırdı, olar arasında hususan, İrına Daniloviç, Galina Dovgopola, Oksana Senecuknıñ adları da bar.

Daimiy Temsilci öz çıqışınıñ soñunda Ukraina içün havfsızlıq kefaletlerini temin etmek içün halqara cemiyetniñ küçlerini birleştirmekniñ müimligini ve rusiyeni çoq sayılı cinayetleri içün cevapkârlıqqa çekmek kerekligini qayd etti. Olga Kurışko forumda Ukraina Prezidenti ofisiniñ baş muavini İgor Jovkvağa, Ukraina tış işler naziriniñ muavini Mariana Betsağa, “Azatlıq Radiosı“ jurnalisti, sabıq siyasiy mabüs Vladislav Yesıpenkoğa ve Qırım uquqq orçalav gruppasınıñ idare başı Olga Skripnikke forumda iştirak etkenleri içün teşekkür bildirdi.

Hatırlatamız, Ekspert ağı forumınıñ maqsadı – Qırımnıñ işğali ile peyda olğan meselelerni muzakere etmek, Ukraina ve ortaqlarınıñ umumiy areketlerini baqıp çıqmaq, em de Ukrainağa ileride destek teminlemek içün ekspert resurslarından semereli faydalanmaq içün tevsiyelerni şekillendirmektir.