Daimiy Temsilci Olga Kurışko “Qırım platforması ekspert ağınıñ dörtünci forumı”çerçivesinde olıp keçken “Qırım emsali — adaletli barışıqnıñ anahtarı” adlı panel muzakeresinde iştirak etti. Muzakerege İnsan aqları meselelerinden Avropa mahkemesiniñ vekili Margarıta Sokorenko, uquqşınaslıq doktorı, professor, Public International Law & Policy Group tesisçisi Pol R. Vilyams, Memleket içinde köçüv ve integratsiya boyunca ekspert Mariya Krasnenko ve Truth Hounds şirketiniñ uquqiy direktorı Zera Kozliyeva qoşuldılar. Muzakereni “AZONES” şirketiniñ ortağı Darya Sviridova alıp bardı.

Muzakere devamında Daimiy Temsilci Olga Kurışko, Qırım bütün dünya içün adalet sınavı olğanını, rusiye federatsiyası ise yapqan cinayetleri içün mesüliyet çekmek kerek olğanını qayd etti. Kurışko Temsilcilikniñ daima vaqtınca işğal etilgen topraqlarda qalğan ya da andan çıqqan vatandaşlar içün telükesiz alâqa mehanizmlerini qıdırğanını ifade etti. Olga Kurışko reintegratsiya siyasetini işlep çıqarmaq ve keçici adaletni şimdi, topraqlarnıñ fizikiy azat etilmesinden evel ömürge keçirmekniñ müimligini qayd etti. 

“Temsilcilikniñ yalıñız astyapı tarafından degil, kognitiv saasında da azat etilecek topraqlarnen nasıl çalışmaq kerekligini añlav yolundan endi keçken bir müessise olaraq toplağan tecribe bütün vaqtınca işğal etilgen bölgelernen bağlı devlet siyasetiniñ şekillendirilmesi  içün esas ola bile”, — dep, yekünledi Olga Kurışko.

Professor Pol R. Uilyams halqara uquqta işğal etilgen Qırım emsaliniñ topraq bütünlikke ait muzakere ve uzlaşuvlarnıñ telükeleri, halqara uquqnı ömürge keçirüv ve adaletli tınçlıqnı teminlev mehanizmleri aqqında ayttı. O, em de vaqtınca işğal etilgen Qırımda rusiye federatsiyası tarafından kerçekleştirilgen insan aqları bozuluvları, hususan, tamır halq temsilcileriniñ taqip etilmesini, ukrain vatandaşlarınıñ zorlap orduğa alınğanını ve qanunsız şekilde apishanelerde tutulğanlarını hatırlattı.

“Topraq bütünligi ve topraq bütünligini bozmaq içün küç qullanuvnı yasaq etüv – bu devamlı barışnı teminlemek içün teren bir meseledir“, — dep qayd etti Law & Policy Group tesisçisi professor Pol R. Uilyams.

Avropa mahkemesiniñ vekili Margarıta Sokorenko, 2014 senesi Qırımnıñ rusiye tarafından işğal etilmesi ve 2022 senesi başlatılğan tam miqyaslı tecavuznıñ uquqiy seviyede tasdıqlanlması ve Avrupa insan aqları mahkemesi tarafından cinayet olaraq tanılması Ukraina içün müimdir. Rusiye tarafından insan aqlarını bozuv tecribesi tek büyükliginde degil, usullarında da keñişley, dep qayd etti Margarıta Sokorenko.

Truth Haunds şirketiniñ uquqiy müdiri Zera Kozliyeva vaqtınca işğal etilgen Qırımda arbiy olmağan ealige munasebet meselesini köterdi. Spikerniñ aytqanına köre, bizim devletimizniñ esas vazifesi – rf tarafından işğal etilgen Qırım sakinlerine qarşı yapılğan cinayetler, hususan işkence ve insanlıqqa qarşı cinayetler içün mesüliyetniñ temin etilmesidir. Onıñ sözlerine köre, bu cinayetlerni vesiqalaştırmaq pek müimdir, çünki bunıñ yardımınen kelecekte Ukrayina qabaatlılarnı mesüliyetke çekip olacaq.

Memleket içinde köçüv ve integratsiya boyunca ekspert Mariya Krasnenko rusiye tecavuzından zarar körgen insanlar içün adalet duyğusı meseleleri aqqında söz yürsetti. İşğal etilgen topraqlardan kelgen adamlarnıñ media kün tertibinde yer alması ve vaqtınca işğal etilgen topraqlardan çıqqanda olarğa devlet tarafından uquqiy ve maddiy yardım temin etilmesi pek müimdir. Bundan ğayrı, Ukraina vaqtınca işğal etilgen topraqlarğa ait açıq devlet siyasetini işlep çıqarmaq kerek — vatandaşlar içün devletimizniñ nasıl yönelişte içkişaf etkenini añlamaq pek müimdir.