Daimiy Temsilci “Yasaq altında: rusiyeni qorqutqan medeniyet ve insanlar” adlı panel munaqaşasında iştirak etti. Munaqaşa “Krayina Mriy” halqara etnofestival çerçivesinde çalışqan “Qırım sanası: Lavanda tarlası” faaliyeti esnasında ötkerildi.
Subetke Ukrain institutınıñ baş müdir muavini Alim Aliyev, mütehassıs Mariya Kulikovska, cemaat faali, siyasiy mabüs Bogdan Zizi Aleksandr Barkovnıñ qardaşı ve yapon jurnalisti Hirano Takashi qoşuldılar. Munaqaşanı QIRIM.MEDIA jurnalisti Naciye Ametova alıp bardı.
Daimiy Temsilci Olga Kurışko çıqışı vaqtında, vaqtınca işğal etilgen Qırımda qarşılıq çoq formatlı olğanını, amma çoqusı vaqıt açıq ya da kütleviy şekilde kösterilmegenini qayd etti. Onıñ aytqanına köre, daimiy basqı, nezaret ve repressiyalar şaraitinde, içtimaiy ağlarda repost ya da urbalarda sarı-mavı renkler kibi küçük areketler bile qarşılıqnıñ şekilleri olabile. Aynı zamanda o, vatandaşlar öz noqta-i nazarlarında yalıñız olmağanlarını hatırlatmaq kerekligini qayd etti:
“Qarşılıq – bir bağ şeklidir. O, boş bir yerde peyda olmay ve desteksiz quvetleşmey. Devlet olaraq bizim vazifemiz – onı köstermek, işğal etilgen topraqta er kün tirenüv yapqanlarğa qol tutmaq.”
Daimiy Temsilci yarımadanıñ vaqtınca işğal etilgen topraqlarında yaşağan vatandaşlarğa nisbeten devamlı devlet siyasetini şekillendirmege kerek olğanını qayd etti. O, Ukraina vatandaşları qarşılaşqan kerçek qıyınlıqlarnı qayd etti: memuriy taqip, çıqış qıyınlıqları, filtratsiya telükesi ve ukrain vesiqalarınıñ olmaması ile bağlı uquqiy sıñırlavlar. Temsilcilik bu meselelerniñ milliy siyaset seviyesinde çezilmesi içün çalışmalar alıp bara.
Panel munaqaşasında iştirakçiler Qırım işğaline cevap olaraq arbiy, medeniy, bediiy ve informatsion ceetten çoq seviyeli qarşılıq aqqında söz yürsettiler. Muzakere iştirakçileri qayd etkenlerine köre, Rusiyege qarşı cenk – yalıñız topraq içün degil, ilk evelâ kimlik ve kelecek içün küreş. İştirakçiler, medeniyet – milliy telükesizlikniñ bir qısmı olğanını, şunıñ içün oña yatırım yapmaq strategik olaraq müim olğanını qayd ettiler.
Halqara haber kontekstine ayrı diqqat ayırıldı: imperatorlıq ve sovet devirlerinde şekillengen rus añlatuvlarınıñ tesiri büyüktir. Spikerler canlı şahsiy ikâyelerniñ, hususan qırımlılarnıñ sesleriniñ, propagandağa qarşı eñ semereli usul olaraq müimligini qayd ettiler. Siyasiy mabüs Bogdan Zizanıñ davası misalinde, işğal altında tınç bediiy ifadeler bile sert bir şekilde cezalandırılğanı, qorqutuv ve basqı ise işğal etilgen Qırımda er künlik ayatnıñ bir parçası olğanı muzakere etildi. İştirakçiler Ukraina vatandaşlarına işğalde yaşağan Ukraina vatandaşlarına qol tutmağa ve qarşılıqnı dünyağa da köstermege çağırdılar.
“Qırım sanası: Lavanda Tarlası” Ukraina Prezidentiniñ Qırım Muhtar Cumhuriyetindeki Temsilciligi, Qırım platforması, “Crimea Daily” media teşebbüsi, “Qırım evi” Devlet müessisesi, TRO Media, Qırımtatar halqı Meclisi, “ZMINA” İnsan aqları merkezi, “QırımSOS” cemaat teşkilâtı, “Qırım İnciri” ukrain-qırımtatar edebiyat leyhası, “Qırım studiyaları” merkezi, QIRIM.MEDIA, “TAKAVA” sıñırlı mesüliyetli cemiyeti, “Musafir” qırımtatar restoranı yardımları sayesinde teşkil etildi.