Daimiy Temsilci Olga Kurışko “Ukraina balalarınıñ qanunsız arbiyleştirüvi, terbiye etilüvi ve sürgün etilüvi esnasında vaqtınca işğal etilgen Qırımnıñ rolü: miqyası, mehanizmleri, aqibetleri” adlı munaqaşada iştirak etti. Subet “Artek” Halqara bala merkeziniñ yüz yıllığına bağışlanğan “XXI asırda Artek: innovatsiyalar, istiqbal tecribesi” Forumı çerçivesinde olıp keçti.

Panel munaqaşalarına balalarnıñ menfaatlarını qorçalav, evde zorbalıq areketlerine ve insan aqlarınıñ bozuluvına qarşılıq kösterüv meselelerinden Qırım Muhtar Cumhuriyeti ve Aqyar şeeri prokuraturasınıñ prokurorı Olga Pirogova ve “Almenda” maarif merkeziniñ başı Mariya Sulyalina qoşuldı.

Çıqış sözünde Daimiy Temsilci “Artek” taqımınıñ bütün azalarını hayırlap, “Artek”niñ terbiyecileri, reberleri, balaları ve mezunlarına “Artek”teki müitni şekillendirgenleri, desteklegenleri ve inkişaf ettirgenleri içün samimiy teşekkürler bildirdi. Olga Kurishko qıyın cenk şaraiti ve yarımadanıñ işğaline baqmadan anda saqlanğan degerliklerniñ emiyetini qayd etti.

Muzakere çerçivesinde Daimiy Temsilci vaqtınca işğal etilgen topraqta tasil müitiniñ deñiştirilmesinen bağlı esas meselelerni aydınlattı. Onıñ qayd etkenine köre, işğalniñ 11 yılı devamında Qırımda rusiye federatsiyasınıñ mecburiy programmaları boyunca tasilini alğan balalar östi. Olga Kurışko Qırımdaki, hususan işğal etilgen “Artek” lageriniñ territoriyasında, işğalciler tarafından balalarnıñ askeriyleştirilüvi ve terbiye etilüvine ayrı diqqat ayırıp, balalarnen, hususan yañı işğal etilgen topraqlardan köçip kelgenlernen yapılğan teşviqat işine diqqat ayırdı. Onıñ qayd etkenine köre, Qırımda evlâtlıqqa aluvnıñ sadeleştirilgen protsedurası bar, em de balalarnıñ vesiqalarını deñiştirüv adiseleri qayd etile. Bunen beraber, Daimiy Temsilci, Ukraina nezaretindeki topraqta bulunğan “Artek” lagerini, Qırım aqqında antikoloniya ve maarif ğayesini şekillendirgen ve genç nesil içün onıñ hatırasını saqlağan bir yer olaraq desteklemesiniñ müimligini ifade etti.

“Biz “Artek” faaliyetine, ilmiy leyhalarnıñ, oquv programmalarınıñ işlep çıqarılmasına qol tutamız, çünki balalarğa Qırım aqqında, onıñ qıymeti aqqında, Ukraina içün ne içün müim olğanı aqqında, ne içün tek topraq degil, bütün kimligimizniñ ayırılmaz parçası olğanı aqqında aytmaq kerek”, – dep qayd etti Olga Kurışko.

“Serbest Qırımğa mektüpler” teşebbüsi,”Artek” Halqara bala merkeziniñ 100 yıllığına bağışlanğan tedbirniñ bir qısmı oldı.

Forum vaqtında er istegen, bugün rusiye apishanelerinde qanunsız tutulğan vatandaşlarımızğa -Qırım siyasiy mabüslerine destek mektübini yazıp oldı. Amma bu teşebbüs yekâne degil edi: meydançıqta qırımlılarğa qol tutmaq ve yarımadanıñ kelecegini yañıdan tüşünmek içün diger faaliyetler de ötkerildi.