Mayısnıñ 28-nde Daimiy Temsilci Olga Kurışko Ukrainada Birleşken Milletler Teşkilâtınıñ Qaçaqlar meseleleri boyunca Yuqarı komissarınıñ ofisi Temsilcisiniñ muavini Elisabeth Matthews ve Ukrainada BMT QMYK Temsilcisiniñ qoruv meseleleri boyunca yardımcısı Nina Şreffer ile bir arağa keldi. Temsilcilik tarafından körüşüvge Qırım platformasınıñ faaliyetini temin etüv hızmetiniñ vekilleri Nelâ Ğrınışın ve Darâya Piskun qoşuldı.

Körüşüv vaqtında Daimiy Temsilci BMT QMYK-ge faaliyetleri içün minnetdarlığını bildirdi ve Temsilcilikniñ esas çalışma yönelişleri aqqında, hususan Qırım sakinlerine yardım etüv, işğal etilgen topraqlardan Ukraina nezaretindeki topraqlarğa çıqqan insanlarnıñ muracaatlarını incelev ve meselelerini çezüv; qanun leyhalarınıñ azırlanmasında iştirak etüv; tasil teşebbüsleriniñ desteklenüvi ve ilâhre. Bu munasebetnen Temsilcilikniñ taqımı, yaşağan yerlerine baqmadan, ukrain tasiline irişim aqqında malümat taşığan ve işğal etilgen Qırım sakinleri içün azırlanğan informatsion-tasil portalını tanıttı.

Olga Kurışko, rusiye Qırımnı işğal etkeninden sebep yarımada ve onıñ sakinleri ögünde turğan meseleler aqqında söz yürsetti. Vaqtınca işğal etilgen topraqlarda uzun müddet devamında yaşağan vatandaşlarnıñ ukrain vesiqaları meselesi, qanunsız şekilde mülkke el qoyulmasına qarşılıq kösterüv, bala ve gençlerniñ askeriyleştirüvi, etraftaki müitke menfiy tesir kibi meseleler köterildi.

Taraflar, mütehassıslarnı birleştirmege ve vaqtınca işğal etilgen Qırımnıñ meselelerini daa teren añlamağa imkân berecek bir qaç esas yönelişte işbirlikniñ mümkün yönelişlerini muzakere ettiler.