18 mayıs qırımtatar halqı genotsidi qurbanlarınıñ añma künü munasebetinen Temsilcilik bütünukrayin informatsion kampaniyasını ömürge keçirdi.

Ukrayina şeerleri, cemiyetleri, köylerinde sovet deviriniñ eñ büyük facialarından biri – 1944 senesi qırımtatar sürgünligi aqqında hatırlatqan bilbordlar, sitilaytlar ve plakatlar peyda oldı.

Umumen Ukrayina boyunca keçken kampaniya çerçivesinde 4,8 biñden ziyade plakat, 180 sitilayt, aman-aman 100 bord, 90-dan ziyade örümcek-baner, ve metrolayt ve skrolingi yerleştirildi.

Bu yıllıq kampaniya altı süjetten ibaret edi, olarnıñ er biri medeniy ve maarif mirasnıñ, hususan kitaplar, mektepler, camiler ve milliy kimlikniñ diger qısımlarınıñ sistematik yoq etilüvinden keniş miqyaslı mecburiy sürgünlikke qadar bu cinayetniñ farqlı aqibetlerini aydınlattı.

Bir qaç kün devamında yarımadanıñ bütün tamır halqı – esasen qadınlar, balalar ve esli-başlı insanlar öz evlerinden Özbekistan, Qazahistan, Ural, Sibir ve Sovetler Birliginiñ diger uzaq regionlarına çıqarıldı. Sürgünlikniñ eñ uzaq mesafesi 4750 kilometrge qadar yetti.

Bundan soñ sovet akimiyeti qırımtatar kimligini yoq etüv siyasetini başlattı: bütün milliy mektepler qapatıldı, kitaplar yoq etildi, yüzlernen cami yoq etildi, tarih toponimileri ise sovet adlarınen deñiştirildi.

Tarihnıñ bu facialı saifeleri ve olarnıñ aqibetleri çeşit levhalarğa aks etilgen haber kampaniyasınıñ temeli oldı.

Haber kampaniyası 18 mayıs vaqiaları aqqında malümatnı tasil müessiseleri arasında tarqatmaqnı da köz ögünde tuttı. Ealini qırımtatar halqınıñ sürgünligi tarihınen tanıştırmaq içün çeşit regionlardaki oquv yurtlarında bir sıra maarif tedbirleri keçirildi.

Temsilcilik Kıyivo-Mogilânska akademiyasınıñ ”Qırım studiyaları” Merkeziniñ reberi Martın-Oleksandr Kısliy ile beraberlikte kiçik ve yuqarı sınıf talebeleri içün mayısnıñ 18-ne bağışlanğan prezentatsiyalar azırladı. Olarda qırımtatar halqınıñ sürgünligi ve onıñ aqibetleri aqqında müim faktlar mevcut.

Bu materiallar 18 mayısta Ukrayinanıñ çeşit regionlarında oquyıcılar tarafından mektep talebeleri içün keçirilgen maarif lektsiyalarınıñ temeli oldı. Prezentatsiyalarnı aşağıdaki bağlantıdan yüklemek mümkün: https://cutt.ly/otMQcC5l.

Tedbirni Büyük Britaniya, Estoniya, Kanada, Norvegiya, Finlândiya, İsviçre ve İsveçiya ükümetleri tarafından maliye etilgen “Küçlü Ukrayina içün ortaqlıq” programmasınıñ destegi ile Ukrayina Yuqarı Radasınen beraberlikte Ukryaina Prezidentiniñ Qırım Muhtar Cumhuriyetindeki Daimiy Temsilciligi/Qırım platforması ofisi tarafından vilâyet arbiy idareleri ve Kıyiv şeer arbiy memuriyeti desteginen teşkil etti.