Avropa Şurası Baş Kâtibiniñ “rusiye federatsiyasınıñ Ukrainağa qarşı tecavuziy cenki ve bunıñ rusiye federatsiyası tarafından vaqtınca kontrol etilgen ya da işgal etilgen Ukraina topraqlarındaki insan aqları vaziyeti içün aqibeti” adlı maruzanıñ azırlanması çerçivesinde, Avropa Şurası Kâtibiyetiniñ delegatsiyası Temsilcilikni ziyaret etti. Delegatsiya terkibinde Siyasiy işler ve tış munasebetler müdiriniñ muavini Kristian Urse, İnsan aqları ve uquqnıñ üstünligi Baş Müdirlikniñ mesleatçısı Katarina Nedielkoviç, siyasiy mesleatçı Marsel Çapi ile Vesiqalaştırma ve Esabatlaştırma meselelerinden yardımcı Yuliya Dmitrieva yer aldı. Toplaşuvğa ayrıca Qırım Platforması faaliyetini temin etüv Hızmetiniñ başı Mariya Tomak, Daimiy Temsilci muavini Denis Çistikov ve Analitik Destek ve Planlaştırma bölüginiñ başı Sergiy Skripnik de qoşuldı.
Ziyaret vaqtında Temsilcilik vekilleri, Qırımdaki aktual vaziyet ve insan aqları bozuluvları mevzusında yıl devamında olğan en soñki meyiller aqqında tafsilâtlı şekilde aytıp berdiler. Toplaşuvda Avrupa Şurası temsilcilerine işğal yönetiminiñ Ukraina vatandaşlarına qarşı qullanğan ceza mehanizmleri – etnik ve diniy sebeplerden zorbalıq, ruslarğa yahşı körmegen sakinlerniñ tutuluvları, mecburiy seferberlik, mülkniñ devletleştirüvi ve Qırım ealisiniñ demografik deñişmeleri aqqında malümat berildi.
Daimiy Temsilciniñ muavini, ruslarnıñ arbiy tehnika ve askerlerini yerleştirmek içün arbiyolmağan astyapını qullanğanı sebebinden işğal altındaki Qırım topraqlarında yaşağan Ukraina vatandaşları içün telüke yaratqanını qayd etti.
Qırım Platforması faaliyetini temin etüv Hızmetiniñ başı Mariya Tomaknıñ sözlerine köre, vaqtınca işğal etilgen yarımadanıñ topraqarında vatandaşlarnıñ diniy aqları daimiy şekilde bozulmaqta. Rusiye Qırımdaki Ukraina ortodoks kilsesini yoq etti, musulman toplulığı temsilcileri de daima basqı altında.
Mariya Tomak vaqtınca işğal etilgen Qırımda söz serbestligi olmağanını qayd etip, Newsweek neşriyatına işğaldeki yaşayış şartları aqqında aytıp bergen Canköy sakini, jurnalist ve uquqqorçalayıcı Lütfiye Zudiyevanıñ evine tañda işğalcler kelip, tintüv yapqanını, ondan soñra da qadınnı tutıp alğanlarını hatırlattı.
Analitik Destek ve Planlaştırma bölüginiñ başı da Ukraina vatandaşlarınıñ rusiye federasiyasına qarşı narazılıqnıñ artmasını köstergen sözde “rusiye federatsiyasınıñ silâlı quvetlerini itibardan tüşürüv” maddesine köre açılğan davalarnıñ sayısı artqanını bildirdi. Skripnik bu qabaatlavlar çerçivesinde işğalciler insanlarnı tevqif etkenlerini, cöremeler töletkenlerini ve Ukrainağa qoltututvğa baqtırılğan er bir areket içün insanlarnı kamera ögünde afu soramağa zorlağanlarını qayd etti.