Prezident Petro Poroşenko ve onıñ ömür arqadaşı Marına Poroşenko AQŞ-da ukrain cemiyetiniñ liderleri ve qırımtatar teşkilâtlarınıñ vekilleri ile körüştiler. Prezident refiqasınen New-Yorkta Ukraina muzeyini ziyaret etti.
Devlet başlığı çetelde yaşağan ukrainalılarğa yardım ve destekleri içün teşekkür etti. ”Ukrainanıñ devlet mustaqılligi ğayrıdan tiklengeninden soñ onıñ tarihinde ilk sefer memleketimizniñ ögünde turğan vazifelerni becermek maqsadınen bu qadar büyük yardım kösterile, dünyadaki bütün ukrainalılar birleşe”, – dep qayd etti o. Ayrıca Petro Poroşenko Ukrainada ukrain dernekleriniñ destegi ile yañı ordu meydanğa ketirilgeni aqqında hatırlattı. Devlet başlığı Ukrainağa yardım olaraq yapılğan amerikan Kongressniñ adımlarını, bu cümleden, Ukrainağa imaye silâsınıñ berilüvi aqqında qararını qayd etti.
”Bu yalıñız areketlerini devam etken Rusiye içün istilâsını paalılaştıracaq vastalar degil, olar bizge Büyük Britaniya, Kanada ve başqa devletlerden de böyle yardım berilmesine imkânlar yarata. AQŞ-nıñ siyasiy qararını bekleymiz” – dep ayttı Ukraina Prezidenti ve bu muzakerelerde pek ilerilegenimizni qayd etti.
‘‘İmayeci silânıñ daa bir hususiyeti – bu yalıñız tanklarğa qarşı qullanılğan Cevelin raketaları degil. Biz özümiz de başqa tarzda çalışıp amma pek semereli neticeler bergen ”Stugnanı” istisal etemiz. Biz Rusiyeniñ istilasınıñ delillerini ketirgen – bizim vatandaşlarımıznı öldürgen ateşni qayerden açqanlarını, Minsk añlaşmasını bozğan ağır silânı qaydan, ne vaqıt ve ne şekilde ketirgenilerini körsetken radioelektron küreşi sisteması aqqında söz yürsetemiz. Eñ azından, bu deliller, RF-nıñ cinayetleri Gaagada baqılğanda, bizim uquqiy mevamımıznı pekiştirir’’. Prezident qayd etkenine köre, ‘‘bu yalıñız silâ degil, ukrain mevamınıñ uquqiy qorçalav vastasıdır”.
”Ukrainalılar – barışıqsever millettir. Biz kimseni öldürmege istemeymiz, lâkin bizim devletimiz al-azırda pek yüksek fiyat töledi – 10 biñge yaqın Ukraina vatandaşı, bu cümleden, 2700 ukrainalı askerler canlarını berdi”, – dep qayd etti Petro Poroşenko. O, ukrainalılar avropalı millet olğanını hatırlattı ve Avropadaki ukrain dernegine Assotsiatsiya boyunca añlaşmasınıñ qabul etilüvine ve ömürge keçirilüvne imkân yaratqan ortaqlığı içün teşekkür etti.
Devlet başı Ukrainada islâatlarnıñ ketişatı aqqında malümat berdi. Bu cümleden, yaqınlarda maarif islâatı qabul etildi. Prezident aytqanlarına köre, ukrainalılarğa adaletke aqlarını qaytarmaq ve mustaqil adliye qurulışını meydanğa ketirmek maqsadınen Yuqarı Şura adliye saasındaki islâatlarnı baqmağa devam etecek.
Ayrıca Prezident qırımtatar halqınına qoltutuv muim olğanını hatırlattı. ”Epimiz beraberlikte qırımtatar halqınıñ meselesi bizim ortaq meselemiz olğanını numayış etmelimiz. Birlik ve beraberligimizni numayış etmelimiz. Ve biz işğalci ve istilâcı memleketniñ yapqanlarınen razı olmamız’’, – Ahtem Çiygoznıñ qanunsız apisi aqqında hatırlatıp, qayd etti Ukraina Devletiniñ başlıqı.
Devletiniñ başlıqı sunniy açlıqnıñ (Golodomornıñ) 85-yıllığı qayd etilgeni ve onı genotsid olaraq tanılmasınıñ muimligi aqqında da hatırlattı. ”Biz şimdi yalıñız Ukrainanı ve canlarını mustaqilligimiz içün bergen ukrainalılarnı qorçalamaymız, biz tarihimizni hatırlap, hatıralarımıznı muafaza etemiz’’- dep qayd etti Petro Poroşenko.
Amerikadaki Ukrain Kongress Komitetiniñ prezidenti Andriy Futey qayd etkenlerine köre, körüşüvde iştirak etken ukrainalılar Vatanlarına yardım köstere ve bütün dünyada yaşağan ukrainalılarnıñ aq-uquqlarınıñ qorçalavı içün büyük ğayretler sarf eteler. ”Bizim maqsadımız – AQŞ ükümetine ve amerikan Kongressine halqara siyaset saasında tesir etebilecek ve böyleliknen siziñ eki taraflı ğayretleriñizge yardım etebilecek birleşken cemiyet” – dep emin etti o. Andriy Futey aytqanlarına köre, american ükümetininden Ukrainağa öldürici silâlarnıñ berilmesi ve muafaza, energetik ve insaniy saaları içün daa ziyede maaliy yardım kösterilmesi içün daa ziyade ğayret sarf etilecek.